Соғлиқни сақлаш вазирлиги Тошкентдаги 3-сонли туғруқ мажмуасида коронавирус инфекцияси қайд этилган ҳомиладор аёлнинг фарзандлиги бўлганини хабар қилди.
Хабарга кўра, коронавирус инфекцияси аниқланиб, мазкур туғруқ мажмуасига олиб келинган 31 ёшли ҳомиладор аёл Б. ўғил фарзандли бўлди.
Аёл Тошкент вилоятидан бўлиб, 2020 йил 10 май куни Россиядан чартер рейс орқали олиб келинган. Унда коронавирус аниқланиб, туғруқ мажмуасига олиб келингач, биринчи навбатда анализ таҳлиллари олиниб, ҳомиладор белгиланган стандартлар бўйича чуқурлаштирилган тиббий кўрикдан ўтказилган.
Ташхис натижаларига кўра, тажрибали мутахассислар тавсияси билан туғруқни шошилинч тартибда, операция йўли билан амалга ошириш тавсия этилиб, тайёргарлик кўрилган. 13 май куни ушбу амалиёт олий тоифали шифокор Комил Жумаев бошчилигидаги шифокорлар томонидан муваффақиятли, асоратсиз якунига етказилди.
Айни пайтда чақалоқнинг ҳолати қониқарли бўлиб, онаси билан бирга неонатолог, акушер-гинекологларнинг тиббий кузатувида бўлиб турибди.
Аввалроқ Тошкентда коронавирус инфекцияси аниқланган ҳомиладор аёл қиз фарзандли бўлгани, коронавирусга чалинган юраги хаста ҳомиладор аёл ўғил фарзандли бўлгани, 23 апрелда Тошкентда туғруқхонага боришга улгурмаган аёл ППХ машинасида фарзандини дунёга келтиргани, шунингдек, Қашқадарё вилояти Деҳқонобод туманида ҳомиладор аёл шифохонага вертолётда олиб борилгани, аёл ўғил фарзандли бўлгани, кейинроқ чақалоққа вилоят ҳокими совғаси топширилгани ҳақида хабарлар берилган.
Изоҳ (0)