Навоий вилояти фавқулодда вазиятлар бошқармаси 13 май куни соат 02:25—04:30 оралиғида вилоятнинг бир қатор ҳудудларида кучли ёғингарчилик (ёмғир) туфайли айрим кўчалар ҳамда дала ҳовлилар томорқаларида сел сувлари тўпланиши кузатилгани ва табиий офат оқибатида қанча зиён кўрилгани юзасидан маълумот берди.
Зарафшон шаҳри ҳамда «Дуагистау» маҳалла фуқаролар йиғинларидаги бир неча кўчаларда кўп миқдордаги ёмғир сувларининг (сел) келиши натижасида айрим турар жойларга қисман зарар етган.
Жумладан, сел сувлари Зарафшон шаҳридаги «Чорбоғ — Зарафшон» боғдорчилик жамиятига қарашли дала ҳовлиларда вақтинча яшовчи аҳоли хонадонлари томорқаларига кириб борган.
Аҳолининг хавфсизлигини таъминлаш мақсадида ушбу ҳудуддаги 120 нафар фуқаро Зарафшон шаҳридаги доимий яшаш уйларига ўтказилган. Шунингдек, шаҳардаги Олчазор ва Мевазор кўчаларида кучли сел сувларининг оқиб ўтиши натижасида битта яшаш хонадони девори қисман зарар кўрган ҳамда иккита хонадоннинг ўраб турувчи қўрғон деворлари йиқилган.
Бундан ташқари, ёғингарчилик туфайли Томди тумани ҳудудидаги 4Р57 автомобиль йўлининг айрим қисмларига қисман зарар етган.
Ҳудудларда тўпланган сувларни ариқ ва шаҳар канализация тармоқларига йўналтириш, етказилган оқибатларини бартараф этиш ҳамда аҳолига тегишли тушунтириш ишларини олиб бориш мақсадида вилоят фавқулодда вазиятлар ҳамда ички ишлар бошқармалари, Миллий гвардия ҳамда тиббиёт ходимлари, шунингдек, зарур техника воситалари жалб этилган.
Зарафшон шаҳри ва Томди туманларининг ёғингарчиликдан зарар кўрган ҳудудларида электр тармоқлари, газ таъминоти корхонаси ҳамда бошқа тегишли соҳа мутахассислари томонидан тезкор ва зарур чора-тадбирлар олиб борилмоқда, дейилади хабарда.
Аввал Зарафшондаги сел оқибатида камида 300 киши эвакуация қилингани ҳақида хабар берилган ва интернетда ушбу ҳодисанинг видеоси тарқалганди.
Изоҳ (0)