Шавкат Мирзиёев раислигида 13 май, чоршанба куни ўтказилган видеоселектор йиғилишида Беҳзод Мусаев ва Шерзод Кудбиев янги лавозимларга тайинланди. Бу ҳақда Президент матбуот хизмати хабар берди.
Йиғилишда Президентнинг «Ўзбекистон Республикаси Вазирлар Маҳкамаси фаолиятини такомиллаштиришга оид қўшимча чора-тадбирлар тўғрисида»ги қарори қабул қилинган. Қарор билан бош вазирга янги вазифалар юклатилган, унинг ўринбосарлари ўртасида ҳам вазифалар қайта тақсимланган.
Хабарда айтилишича, ижтимоий соҳанинг аҳамияти ортиб бораётгани боис бош вазирнинг ижтимоий ривожлантириш масалалари бўйича ўринбосари лавозими жорий этилди. Бу лавозимга шу кунгача Давлат солиқ қўмитаси раиси вазифасида ишлаб келган Беҳзод Мусаев тайинланди.
Шунингдек, Давлат солиқ қўмитаси раҳбарлигига Президентнинг давлат хизмати ва ҳокимият вакиллик органлари билан ҳамкорлик қилиш масалалари бўйича маслаҳатчиси Шерзод Кудбиев тайинлангани маълум қилинди.
Йиғилишда Самарқанд ва Қашқадарё вилояти ҳокимлари, бошқа ҳудуд ва тармоқлар раҳбарлари белгиланган вазифалар ижросини ташкил этиш юзасидан ҳисобот берди.
Эслатиб ўтамиз, уларнинг ушбу лавозимларга тайинланиши кутилаётгани ҳақида Олий Мажлис Қонунчилик палатаси депутати, «Юксалиш» умуммиллий ҳаракати раиси Акмал Бурҳонов маълум қилганди.
Изоҳ (0)