Тошкент вилоятида 8 май куни пиёдалар иштирокида учта йўл-транспорт ҳодисаси содир бўлди. Улардан иккитаси одам ўлими билан якунланди. Бу ҳақда ЙҲХББ хабар берди.
8 май куни соат 17:30 лар атрофида ҳайдовчи 1984 йилда туғилган С.Х. Nexia автомобилини Олмалиқ шаҳар, Пиримқулов кўчаси бўйлаб бошқариб бораётган вақтида йўлнинг пиёдалар учун белгиланмаган жойидан кесиб ўтаётган пиёда — 1937 йилда туғилган К.Т.ни уриб юборган. Пиёда тезда шифохонага олиб борилган. Шифокорларнинг ҳаракатлари билан унинг ҳаёти асраб қолинди. ЙҲХББнинг ёзишича, 83 ёшли аёл энди узоқ вақт даволанишига тўғри келади.
Шу куни Ангрен шаҳрида ҳам ЙТҲ содир бўлди. 1986 йилда туғилган И.Д. Lacetti автомобилини шаҳарнинг Алишер Навоий кўчасида бошқариб кетаётган вақтида пиёда — 1939 йилда туғилган М.О.ни уриб юборган. Шифокорлар оғир тан жароҳатлари олган пиёданинг ҳаётини сақлаб қола олмаган.
8 май куни соат 23:30 лар атрофида Тошкент туманининг «Олтинтепа» маҳалла фуқаролар йиғини ҳудудида пиёда иштирокида яна бир йўл-транспорт ҳодисаси содир бўлди. 1992 йилда туғилган О.С. Cobalt автомобилини сунъий ёритилмаган ҳудудда бошқариб кетаётган вақтида йўлнинг ўнг томонидан чап томонига кесиб ўтаётган пиёда — 1965 йилда туғилган пиёда К.Р.ни уриб юборган. Пиёда зудликда шифохонага олиб борилишига қарамасдан, олинган тан жароҳатлари ҳаёт учун хавфли бўлганлиги сабаб жонлантириш бўлимида вафот этган.
Аввалроқ Тошкент вилоятида содир бўлаётган ЙТҲларнинг ҳар иккитадан биттаси пиёдалар иштирокида содир бўлаётгани, тунги вақтда ЙТҲларнинг олдини олиш учун пиёдалар ўтиш жойини чироқлар билан ёритиш бошлагани хабар қилинганди.
ЙҲХББ матбуот хизматининг ёзишича, пиёда масаласи, улар томонидан содир этилаётган қоидабузарликлар, пиёдалар иштирокидаги йўл-транспорт ҳодисалари энг муаммоли ҳолатлардан бири бўлиб қолмоқда. Бундай ҳодисалар кунора республиканинг барча ҳудудларида, шу жумладан, Тошкент вилоятида ҳам содир бўляпти.
«Гарчи уларнинг олдини олиш юзасидан аниқ чора-тадбирлар кўрилаётган бўлса-да, вазият яхши томонга қараб ўзгариши жуда секин кечмоқда. Чунки бу ҳаракатларда қарсак икки қўлдан чиқмаяпти. Пиёдалар масъулиятни ҳис этишмаяпти», — деб ёзади ЙҲХББ матбуот хизмати.
Изоҳ (0)