2002 йилда катта экран юзини кўрган «Ҳалок бўл, лекин ҳозир эмас» фильмида Жеймс Бонд ролини ижро этган актёр Пирс Броснан қандай қилиб Aston Martin’ни ўзига суперкар совға қилишга кўндирганини сўзлаб берди, деб хабар қилади Motor.
Бондиананинг 20-қисмида Пирс Броснан тўртинчи ва охирги бор британиялик махфий жосус Жеймс Бонд ролини ижро этган. Айнан ушбу қисмда «Агент 007» 1995 йилги «Олтин кўз» фильмидан буён биринчи бор яна Aston Martin рулига ўтирган. «Ҳалок бўл, лекин ҳозир эмас» британияликлар учун V12 Vanquish’ни реклама қилишнинг ажойиб имконияти бўлган, аммо бош рол қаҳрамони ўзига суперкар талаб қилишини ҳеч ким ҳисобга олмаган. Броснаннинг маълум қилишича, у ростан ҳам Aston Martin маркетинг ҳаракати сифатида ўзига автомобиль совға қилишига умид билдирган.
Бироқ британияликлар бундай фикрда бўлмаган. Актёр бундан хабар топгач, фильмнинг экранларга чиқиши муносабати билан ўтказилган матбуот анжуманида атайлаб V12 Vanquish’га яқинлашмаган. Броснан ўзининг агенти орқали ҳам автомобиль ишлаб чиқарувчига босим ўтказган ва оқибатда британияликлар таслим бўлиб, актёрга ўз исми туширилган табличкали (маълумот ёзилган тунука) суперкарни совға қилган. Афсуски, орадан йиллар ўтгач, 2015 йили автомобиль Броснаннинг Maлибудаги уйи билан бирга ёниб кетган. Ундан фақат бир жуфт табличка қолган холос.
Изоҳ (0)