Чикагода Volvo VNL юк машинаси ҳайдовчиси ўзининг бошлиғига тегишли Ferrari GTC4 Lusso автомобилини босиб кетди. Бу орқали ҳайдовчи фирма раҳбариятининг ҳаракатларидан норози эканлигини билдирган. Ҳайдовчи ва бошлиқ ўртасидаги можарога айнан нима сабаб бўлгани номаълум, деб хабар беради Motor.
Reddit форуми фойдаланувчилари авариянинг кўплаб суратларини топишга муваффақ бўлган, бироқ можарога нима сабаб бўлгани тўғрисидаги маълумотлар бир-бирига зид: кимдир ҳайдовчи маошини олмагани учун Ferrari’ни босиб кетган деса, бошқа маълумотларга кўра, бу каби ғазабга фирма раҳбариятининг шартномада белгиланган шартларни бажармай, ҳайдовчини янги юк машинасига ўтказишдан бош тортгани сабаб бўлган демоқда.
Транспорт компанияси ҳозирча мазкур аварияга изоҳ бермaган. Суратларга кўра, Ferrari GTC4 Lusso’ни қайта тиклаб бўлмайди: юк машинаси Ferrari’нинг олд капотини пачоқлаб, уни том маънода деворга ёпиштириб қўйган. Таъкидланишича, ишлаб чиқарилган йили ва босган масофасига кўра, GTC4 Lusso АҚШнинг иккиламчи бозорларида 200 мингдан 280 минг долларгача туради.
Ижтимоий тармоқларда юк машинасининг номаълум ҳайдовчисини «ишчи синф қаҳрамони» деб аташмоқда.
Изоҳ (0)