Соғлиқни сақлаш вазирлиги, АОКА, Ўзбекистон Ёшлар иттифоқи ҳамда Миллий масс-медиани қўллаб-қувватлаш ва ривожлантириш жамоат фонди томонидан ташкил қилинган Telegram’даги «Koronavirus Info» канали Республика махсус комиссиясининг қарори билан карантин чекловлари 2020 йил 10 майга қадар амал қилиши белгилангани туфайли айрим фуқароларда 11 майдан бошлаб карантин тугади, деган нотўғри фикрлар пайдо бўлаётгани юзасидан изоҳ берди.
Унга кўра, карантин чекловлари бутунлай бекор қилинмаган. Республика махсус комиссиясининг 2020 йил 6 майдаги йиғилиш баёнига асосан карантин талабларини босқичма-босқич юмшатиш чоралари белгиланган.
Коронавирус инфекцияси тарқалиши ва беморларнинг даволаниш (соғайиш) динамикаси тўғрисидаги маълумотлар таҳлили асосида ҳудудлар учта тоифага («қизил», «сариқ», «яшил») ажратилди ва ҳар бир тоифа учун алоҳида чекловлар белгиланди.
Таҳлиллар мунтазам равишда амалга ошириб борилиб, олинган натижаларга кўра мазкур уч тоифага кирувчи ҳудудларнинг ҳар бирида чекловлар бекор қилиб борилади ёки кучайтирилади.
Ҳудудлар 2020 йил 8 майдан бошлаб вилоятлар ҳамда 11 майдан бошлаб туман ва шаҳарлар даражасида тоифаларга ажратилиб, ушбу тоифалардан келиб чиққан ҳолда амалга оширишга рухсат бериладиган (берилмайдиган) муайян фаолият турлари белгиланган.
Ушбу самарали тизим орқали мамлакат иқтисодий-ижтимоий ҳаётининг маълум маромда изга тушиши, карантин чекловларининг оқилона ва мақсадга мувофиқ тарзда амал қилиши таъминланади. Шунингдек, вирус тарқалиши ва эпидемиянинг жиловланиши ҳудудлар кесимида самарали мониторинг қилиб борилади.
Каналдаги хабарда Ўзбекистонда карантин давом этаётгани маълум қилиниб, белгиланган чекловларга қатъий амал қилиш лозимлиги тушунтирилган.
Изоҳ (0)