“Бу ўйин икки халқни бирлаштирди” — Саида Мирзиёева Қирғизистонда ўтган “Заковат” турнири ҳақида

Ўзбекистон терма жамоаси Қирғизистонда ўтказилган Zakovat Asian Cup II мусобақаси ғолиби бўлди. Президент администрацияси раҳбари Саида Мирзиёева ғалаба билан табриклади.

“Кеча Бишкекда Zakovat Asian Cup II турнири якунланди. Унда Ўзбекистон ва Қирғизистон терма жамоалари интеллектуал курашда ўзаро куч синашди. Рақибимизнинг муносиб ўйини барча мухлисларни бир оз ҳаяжон ва хавотирга солган бўлса-да, жамоамиз уйга ғалаба билан қайтди. Табриклайман.

Аммо муҳими, бу ўйин икки халқни бирлаштирди, кўтаринки кайфият инъом этди ва чегаранинг икки тарафидан жамланган кўплаб одамларни дўстлаштирди. Қирғизистонлик дўстларимизга самимий қабул ва меҳмондўстлик учун ташаккур билдирамиз”, деб ёзган у.

Аввалроқ Саида Мирзиёева Қирғизистонга ташрифи чоғида президент Садир Жапаров билан учрашгани хабар қилинганди. Шу билан бирга, Қирғизистон президенти администрацияси раҳбари – Вазирлар маҳкамаси раиси Адилбек Қасималиев билан учрашув ташкил этилган. Мулоқотларда икки давлат ўртасидаги ҳамкорликни кенгайтириш ва ривожлантириш масалалари муҳокама қилинган.