Наманганда якка тартибдаги тадбиркорга ер олиб беришни ваъда қилиб, ундан 5 минг доллар ундирмоқчи бўлган шахс ушланди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, Департаментнинг Наманган вилояти бошқармасига якка тартибдаги тадбиркор А.Х. мурожаат қилиб, М.Ш. Наманган шаҳридаги «Машад» мавзесидан тадбиркорлик фаолияти билан шуғулланиши учун 0,3 гектар ер майдони олиб бериш масаласини ҳал қилиш эвазига ундан 5 минг доллар талаб қилиб, аванс тариқасида олдиндан 500 доллар беришини сўраётганлигини билдирган ва унга нисбатан қонуний чора кўришни сўраган.
Тадбиркорнинг ушбу мурожаатида келтирилган важларни текшириш мақсадида Департамент ходимлари томонидан ўтказилган тезкор тадбирда фуқаро М.Ш. тадбиркор А.Х.дан юқори лавозимда ишловчи танишлари орқали юқоридаги манзилдан 0,3 гектар ер майдони ажратиб бериш эвазига 300 доллар ва 1,9 миллион сўмни фирибгарлик йўли билан олган вақтида ашёвий далил билан ушланган.
Мазкур ҳолат юзасидан М.Ш.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)