Ижтимоий тармоқларда 8 май, жума куни Тошкент шаҳрида қурилаётган кўп қаватли бинонинг деворлари шамолда қулаб тушаётгани акс этган видео тарқалди. Ўзбекистон Қурилиш вазирлиги мазкур ҳолатга муносабат билдирди.
Маълум қилинишича, ушбу ҳолат Мирзо Улуғбек тумани Тўрт ариқ кўчасидаги 3 ва 5-уй манзилида жойлашган, фуқаро Р.А. Пишенкога тегишли бинода содир бўлган. Мазкур бино турар жой чегара ҳудудидан чиқмаган ҳолда нотурар жой тоифасига ўтказилган. Ҳозирда бизнес марказ сифатида қайта таъмирланаётган бўлган.
Тошкент шаҳар қурилиш соҳасида ҳудудий назорат инспекцияси томонидан мазкур ҳолат атрофлича ўрганиб чиқилган. Маълум бўлишича, бизнес марказ биносини қайта таъмирлаш бўйича лойиҳа ҳужжатлари «Архитектура қурилиш интеграция ва инновация маркази» компанияси томонидан ишлаб чиқилган. Ҳозирги кунда қурилиш-монтаж ишлари пудрат ташкилоти — АZIMUT-MIG МЧЖ томонидан амалга оширилмоқда.
Ишчи лойиҳага мувофиқ, ташқи девор конструкциясини териш учун лойиҳада темир бетон маҳкамлагич ва деворни қаттиқ тутиб турувчи мосламалар билан бирга газобетон блок D500 белгиланган. Пудратчи томонидан Ўзбекистонда карантин эълон қилингунга қадар бинонинг учинчи қаватигача бўлган қисмининг ташқи девор ишлари якунига етган. Бироқ карантин сабабли тўртинчи ва ундан юқори қаватларда ташқи деворларни териш ишлари охирига етказилмай қолиб кетган.
Натижада ойна ва эшик кесишмалари боғланмагани сабабли 8 май куни кузатилган кучли ёмғир ва шамол оқибатида бинонинг юқори қаватидаги ташқи деворнинг бир қисми объект ҳудудига қулаб тушган. Қўшни бино ва иншоотларга, инсонларга зарар етмаган.
Вазирлик томонидан таъкидланишича, объектда янада кўпроқ талафот келиб чиқмаслиги учун дарҳол юқори қаватдаги ташқи деворлар атайин бино ичкарисига демонтаж қилинган. Ҳозирги кунда объект ҳудудида тозалаш ишлари олиб борилмоқда ва ташқи деворни қуриш ишлари белгиланган меъёрлар асосида олиб борилиши қатъий назоратга олиниши маълум қилинган.
Эслатиб ўтамиз, 2020 йилнининг 1 май куни Сирдарё вилоятидаги Сардоба сув омборида содир бўлган фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган; ҳодиса оқибатида камида 56 киши турли даражада тан жароҳати олган, тошқин зонасида қолиб кетган юзлаб одамлар қутқарилган, шунингдек, 4 нафар фуқаронинг табиий офат оқибатида ҳалок бўлгани, 1 нафари бедарак йўқолгани аниқланди.
Изоҳ (0)