Ijtimoiy tarmoqlarda 8-may, juma kuni Toshkent shahrida qurilayotgan ko‘p qavatli binoning devorlari shamolda qulab tushayotgani aks etgan video tarqaldi. O‘zbekiston Qurilish vazirligi mazkur holatga munosabat bildirdi.
Ma’lum qilinishicha, ushbu holat Mirzo Ulug‘bek tumani To‘rt ariq ko‘chasidagi 3 va 5-uy manzilida joylashgan, fuqaro R.A. Pishenkoga tegishli binoda sodir bo‘lgan. Mazkur bino turar joy chegara hududidan chiqmagan holda noturar joy toifasiga o‘tkazilgan. Hozirda biznes markaz sifatida qayta ta’mirlanayotgan bo‘lgan.
Toshkent shahar qurilish sohasida hududiy nazorat inspeksiyasi tomonidan mazkur holat atroflicha o‘rganib chiqilgan. Ma’lum bo‘lishicha, biznes markaz binosini qayta ta’mirlash bo‘yicha loyiha hujjatlari “Arxitektura qurilish integratsiya va innovatsiya markazi” kompaniyasi tomonidan ishlab chiqilgan. Hozirgi kunda qurilish-montaj ishlari pudrat tashkiloti — AZIMUT-MIG MChJ tomonidan amalga oshirilmoqda.
Ishchi loyihaga muvofiq, tashqi devor konstruksiyasini terish uchun loyihada temir beton mahkamlagich va devorni qattiq tutib turuvchi moslamalar bilan birga gazobeton blok D500 belgilangan. Pudratchi tomonidan O‘zbekistonda karantin e’lon qilingunga qadar binoning uchinchi qavatigacha bo‘lgan qismining tashqi devor ishlari yakuniga yetgan. Biroq karantin sababli to‘rtinchi va undan yuqori qavatlarda tashqi devorlarni terish ishlari oxiriga yetkazilmay qolib ketgan.
Natijada oyna va eshik kesishmalari bog‘lanmagani sababli 8-may kuni kuzatilgan kuchli yomg‘ir va shamol oqibatida binoning yuqori qavatidagi tashqi devorning bir qismi obyekt hududiga qulab tushgan. Qo‘shni bino va inshootlarga, insonlarga zarar yetmagan.
Vazirlik tomonidan ta’kidlanishicha, obyektda yanada ko‘proq talafot kelib chiqmasligi uchun darhol yuqori qavatdagi tashqi devorlar atayin bino ichkarisiga demontaj qilingan. Hozirgi kunda obyekt hududida tozalash ishlari olib borilmoqda va tashqi devorni qurish ishlari belgilangan me’yorlar asosida olib borilishi qat’iy nazoratga olinishi ma’lum qilingan.
Eslatib o‘tamiz, 2020-yilnining 1-may kuni Sirdaryo viloyatidagi Sardoba suv omborida sodir bo‘lgan favqulodda vaziyat tufayli Sardoba, Oqoltin, Mirzaobod tumanlaridagi 24 ta mahalladan 90 mingga yaqin fuqaro zudlik bilan xavfsiz hududga evakuatsiya qilingan; hodisa oqibatida kamida 56 kishi turli darajada tan jarohati olgan, toshqin zonasida qolib ketgan yuzlab odamlar qutqarilgan, shuningdek, 4 nafar fuqaroning tabiiy ofat oqibatida halok bo‘lgani, 1 nafari bedarak yo‘qolgani aniqlandi.
Izoh (0)