Тошкент шаҳридаги даволаш муассасаларида 36 нафар ҳамда Сирдарё вилоятида 1 нафар коронавирус инфекциясига чалинган бемор бутунлай соғайди ва 11 май куни реабилитацияга кузатилди. Бу ҳақда Соғлиқни сақлаш вазирлиги хабар берди.
Тошкент шаҳрида тузалганларнинг 26 нафари Тошкент шаҳридан, 4 нафари Фарғона вилоятидан. Шунингдек, Наманган ва Тошкент вилоятларидан 2 нафардан, Қорақалпоғистон Республикаси ва Жиззах вилоятларидан 1 нафардан ҳам тузалганлар қаторидан жой олган.
Соғайганлардан 26 нафари коронавирус инфекциясига чалинганлар билан мулоқот орқали касалликни юқтириб олган. 7 нафар бемор Россиядан, 3 нафари эса Қозоғистондан келган ва карантинга олинган. Уларда коронавирус инфекцияси аниқлангач, шифохонага ётқизилган. Беморлардан 28 нафари эркак, 8 нафари аёл. Улар орасида энг каттаси 61 ёшда бўлса, энг кичиги 2019 йилда туғилган.
Тошкент шаҳрида шу пайтга қадар коронавирусдан тузалганлар сони 611 нафарга етди.
Сирдарё вилоятида тузалган 40 ёшли эркак Янгиер шаҳридан бўлиб, Россиядан келган ва карантинга олинган. Коронавирус инфекцияси аниқлангач, мазкур бемор шифохонага ётқизилган. Вилоятда шу пайтга коронавирусдан тузалганлар сони 14 нафарга етди.
Ўзбекистонда 11 май куни 101 нафар бемор бутунлай тузалди. Айни пайтда мамлакат бўйича коронавирус инфекциясидан бутунлай соғайганлар сони 1982 нафарни ташкил этмоқда.
Ўзбекистонда 11 май соат 16:00 ҳолатига кўра, коронавирусга чалинганлар сони 29 кишига ошиб, 2482 нафарга етди. Ўзбекистонда коронавирус инфекцияси илк бор қайд этилган 15 мартдан буён 10 киши инфекция асоратлари оқибатида вафот этган.
Изоҳ (0)