Аввалроқ Тошкент шаҳар Учтепа туманида жойлашган Фарҳод автомобиль эҳтиёт қисмлари бозори ичидаги барча ходимлари билан ёпилгани, тадбиркорларнинг бирида юқори тана ҳарорати кузатилгани ҳақида хабар берилган эди. Тошкент шаҳар ИИББ бозор нима сабабдан ёпилганини маълум қилди.
Маълум қилинишича, Фарҳод автомобиль эҳтиёт қисмлари бозори дезинфекция қилиш ва савдо жойларини санитария-эпидемиология меъёрларига мувофиқлаштирилиши учун ёпилган. Тадбиркорлардан бирининг иситмаси борлиги ҳақида тарқаган маълумот ҳақиқатга тўғри келмайди.
Қайд этилишича, эҳтиёт қисмлар бозорида ҳар бир савдо жойи тегишли дезинфекция анжомлари билан жиҳозлангандан сўнг бозор ўз ишини давом эттиради.
Шунингдек, Учтепа туман ҳокимлиги матбуот хизмати ҳам бозор тадбиркорлардан бирида юқори тана ҳарорати аниқлангани сабаб ёпилгани тўғрисидаги хабарларни рад этганди ҳамда мазкур савдо қаторларида Санитария куни эълон қилганини билдирган.
«Тегишли ишлар амалга оширилганидан сўнг, автомобиль эҳтиёт қисмлари дўкони қайта иш бошлайди», — дейилади ҳокимлик хабарида.
Ўзбекистонда 11 май соат 16:00 ҳолатига кўра, коронавирусга чалинганлар сони 29 кишига ошиб, 2482 нафарга етди. Мамлакатда коронавирус инфекцияси илк бор қайд этилган 15 мартдан буён 1982 киши касалликдан соғайди, 10 киши эса инфекция асоратлари оқибатида вафот этган.
Изоҳ (0)