Тошкент шаҳар ҳокимлиги пойтахтда карантин чекловлари ҳали тўлиқ олиб ташланмаганига қарамай умумий овқатланиш соҳасида «Қанотчи» ресторани томонидан етказиб бериш хизматидан ташқари мижозларга бевосита хизмат кўрсатиш, яъни одамларнинг ресторанга келиб овқатланиши ҳолатлари кузатилганлиги юзасидан расмий изоҳ берди.
«Ушбу тажриба Тошкентда овқатланиш масканлари босқичма-босқич очилиши учун чора-тадбирлар тартибини ишлаб чиқиш учун зарур эди. Айни вақтда эксперимент якунига етган, ресторан ёпилган», – дейилади хабарда.
Шунингдек, хабарда СЭОМ, ИИББ ва Тошкент шаҳар ҳокимлигининг умумий хулосасига асосан шаҳар умумий овқатланиш масканларининг очилиши учун чоралар режаси ҳамда регламенти ишлаб чиқилиши таъкидланган.
Эксперимент доирасида «Қанотчи» ресторани маъмурияти ўз ҳисобидан овқатланиш залини СЭОМ меъёрлари асосида жиҳозлаб, дезинфекция ишларини амалга оширган ва меҳмонларни залда жойлаштириш, уларга хизмат кўрсатиш ва киритиш бўйича барча белгиланган чоралар ишлаб чиқилган.
«Батафсил фото ва видеоҳисобот Махсус комиссияга қарор қабул қилиш учун тақдим қилиниб, у асосида умумий овқатланиш масканларини ишга тушириш тартиби белгиланади.
Рестораннинг одатий тартибда ишга тушгани ҳақида оммага тақдим қилинган маълумот юзасидан эса нотўғри ахборот тарқатиб пойтахт аҳолисига янглиш маълумот беришда айбдорлар қонунчиликда белгиланган тартибда жавобгарликка тортилади», – дейилади хабарда.
6 майда эълон қилинган Республика махсус комиссиясининг карантин чекловларини босқичма-босқич юмшатиш бўйича ахборотида карантин чекловлари 2020 йил 8 майидан бошлаб учта тоифага (қизил, сариқ ва яшил) кирувчи ҳудудларга ажратилиб, босқичма-босқич бекор қилиб борилиши белгиланган. Умумий овқатланиш йўналишидаги объектларнинг мижозларга бевосита хизмат кўрсатишига рухсат бериш учала тоифадаги ҳудудларга ҳам татбиқ этилмаган. «Қанотчи» ресторани комиссия қарори билан «сариқ» ҳудудга кирувчи Тошкент шаҳрининг «сариқ» ҳудуди Яккасарой туманида жойлашган.
Изоҳ (0)