Россия президенти Владимир Путин россияликларга мурожаати вақтида коронавирус инфекциясининг тарқалишини камайтириш учун жорий қилинган ишланмайдиган кунлар режими 12 майдан тугатилишини эълон қилди. Унинг чиқишини «Россия 24» канали тўғридан-тўғри эфирга узатган.
Унинг айтишича, 12 майдан бошлаб имкон қадар иқтисодиётнинг асосий тармоқлари, шу жумладан, энергетика, қишлоқ хўжалиги ва саноат ишларини қайта тиклаш керак. Ҳудудий ҳокимликлар муайян вазиятга қараб чекловларни юмшатиши ёки кучайтириши мумкин, губернаторлар эса санитария талабларига жавоб бермайдиган корхоналар фаолиятини тўхтатиб қўйиш ҳуқуқини сақлаб қолади.
«Эртадан, 12 майдан бошлаб бутун мамлакат ва иқтисодиётнинг барча тармоқлари учун ягона ишламайдиган давр тугайди. Аммо эпидемияга қарши кураш тугамайди. Ҳатто вазият нисбатан яхши бўлган ҳудудларда ҳам унинг хавфи сақланиб қолади», — деган у.
Путин ишланмайдиган кунлар умумий ҳисобда 6 ҳафта давом этганини, ушбу фавқулодда чоралар коронавирус оқибатларига қарши курашга мамлакатнинг барча ҳудудларида янада яхшироқ тайёргарлик кўриш имконини берганини таъкидлаган. Президентнинг билдиришича, энди тиббиёт тизимида ортиқча юкланиш йўқлиги сабабли ишланмайдиган кунлар режимини бекор қилиш мумкин.
Шунингдек, Россия президенти 65 ёшган ошганлар ва сурункали касалликларга эга кишилар учун чеклов режими сақланиб қолишини таъкидлаб, улар уйда ўтириш қийинлигини тушуниши, аммо буни ўзларининг ҳаёти билан боғлиқ масала деб ҳисоблашини айтиб ўтган.
Эслатиб ўтамиз, Путин 25 март куни телевидениедаги чиқишида COVID-19 тарқалишини назорат қилиш учун 30 мартдан 5 апрелгача ишланмайдиган ҳафта деб эълон қилган эди. Мамлакатда фақат ҳукумат махсус рўйхатига киритилган корхона ва муассасаларнинг ишлашига рухсат берилган, жумладан, аҳолига зарур бўлган бирламчи эҳтиёж товарларини ишлаб чиқарувчи корхоналар ўз фаолиятини тўхтатмаганди. Кейинчалик бу режим 30 апрелгача ва 11 майгача узайтирилганди.
Айни пайтда Россия коронавирусга чалинганлар сони бўйича дунёда учинчи ўринга кўтарилди. Мамлакатда 2 мингдан ортиқ одам COVID-19 қурбонига айланган.
Изоҳ (0)