Ольга Жирникова Фёдоровна52 ёшда, Тошкент шаҳар 91-сонли мактабда бошланғич синф ўқитувчиси.
Ольга Фёдоровна 30 йил давомида ўқитувчи бўлиб ишлаган. Қисқа вақтга ишдан чалғиб, бизга кичик интервью беришга ва барчамизга қийин бўлган вақт — карантинда қандай ишлаётганлари билан бўлишишга розилик билдирди.
«Ўқитувчи бўлиш ғояси болалигимда келган. У вақт ўз қўғирчоқларимни ва кичик синглимни олдимга ўтиргизиб олиб, ўқитувчини тасвирлашга ҳаракат қилар эдим, уларга ўқиш, ёзиш ва ҳатто гапиришни ўргатар эдим» — дея қаҳрамонимиз жилмайиб, ўз ҳикоясини бошлади.
Айтинг-чи, ҳозир қандай қилиб дарс ўтмоқдасиз?
«Дарслар Халқ таълими вазирлиги томонидан тасдиқланган режага мувофиқ тажрибали ўқитувчилар томонидан видеодарслар ёрдамида ўтилмоқда. Болалар ҳар куни уй вазифасини бажарадилар, кейин ўқитувчи барча ишларни текширади ва уларни баҳолайди. Баоларни ўқувчилар, ота-оналар, ўқитувчилар ва мактаб маъмурияти кўриши мумкин».
Ишда қандай қийинчиликларга дуч келмоқдасиз?
«Ҳозирда масофавий таълимда биз, барча ўқитувчилар, болалар билан мулоқот қилишда катта қийинчиликларга дуч келмоқдамиз, бизда жонли дарслар йўқ, бизга болаларнинг чақноқ кўзлари етишмаяпти. Айни пайтда ўқитувчи болаларни ўқишга илҳомлантиришга ва болаларнинг эътиборини дастурнинг муайян мавзуларига қаратишга ҳаракат қилмоқда. Баъзан бу жуда қийин, чунки ўқув жараёнини жонли равишда назорат қилиш имконияти йўқ. Лекин масофавий таълим натижаларини кўриш ўқитувчи учун катта қувончдир. Албатта, ўқитувчиларга ва болаларга ҳам осон эмас, ҳар бир киши мактабни ва жонли ўқув жараёнини жуда соғинди. Лекин бу билан бирга кичик қувонч ҳам бор. Болалардан хабарларни қабул қилиш жуда ёқимли, улар ўз оиласида рўй берадиган янги воқеаларни баҳам кўришади, байрамларда табриклашади ва мактабни жуда соғиниб, тез орада учрашишга умид қилишларини айтадилар».
Ушбу вазиятда қийин ҳоллар учраганда барчасини ташлаб кетгингиз келган пайтлар бўлдими?
«Яхшиямки, мен буни ҳеч қачон хоҳламаганман, танланган мутахассислигимдан пушаймон бўлган бир лаҳза ҳам бўлмаган. Иш билан, мен биринчи навбатда ахлоқий, моддий ва маънавий мамнуният оламан. Буларнинг барчаси бирлашганда, профессионал сифатида мен учун бу орзуимдаги касбни бежиз танламаганлигимни анлатади».
Илтимос, болалар ёки уларнинг ота-оналари билан содир бўлган бирор бир қизиқ воқеалар билан бўлишсангиз?
«30 йил давомида албатта, ҳар хил воқеалар бўлган: қайғули, қувончли ва ҳаяжонли, аммо менинг ўқитувчилик фаолиятимда энг эсда қоларли воқеа мен нафақат она, балки ўғлим учун ҳам биринчи ўқитувчи бўлишим эди. У биринчи синфга келган дам жуда ҳаяжонли эди ва 4 йил давомида она ва ўғил, ўқитувчи ва ўқувчининг ролини бирлаштириш жуда қийин бўлди. Бошланғич синфда биринчи синф ўқувчилари учун энг таъсирли лаҳзалар бу доим биринчи қўнғироқдир...»
Маълумотни масофадан ўзлаштиришга қийналган ўқувчиларга қандай ёрдам берасиз?
«Ҳар бир бола учун, айниқса бошланғич мактабда унинг ўқитувчиси иккинчи онадир. Шунинг учун, дастлаб болалар учун бошқа ўқитувчиларни телевизордан идрок этиш ва уларга эътиборни қаратиш қийин эди. Албатта, бу ота-оналар учун ҳам, болалар учун ҳам маълум қийинчиликларни келтириб чиқаради. Шунинг учун биз болалар билан видео алоқа орқали қўшимча равишда ишлашга қарор қилдик, бу ерда биз улар тушунмаган нарсаларни муҳокама қиламиз. Биз дарснинг у ёки бу мавзуларини қайта таҳлил қиламиз, шунда албатта барчаси анча содда ва тушунарли бўлади. Бундан ташқари, умид қиламанки, карантин тугаши билан барчамиз ўтказиб юборган мавзуларга қайтиб, уларни ўзлаштириб оламиз».
«Мана шундай қийин пайтда мен барча ўқитувчиларга қатъийлик, касбига яна-да кўпроқ садоқат тилайман. Мен азиз фарзандларимга ва она юртимизнинг барча ўқувчиларига ҳар доим нима бўлишидан қатъи назар, ўқиш истаги доим бўлишини тилайман ва азиз ота-оналарга сабрли бўлганлари, фарзандларини қўллаб-қувватлаши ва болаларига бўлган катта севгиси учун миннатдорчилик билдирмоқчиман. Ҳозир бунга ҳар бир бола ҳар қачонгидан ҳам кўпроқ, муҳтож», — дедилар Ольга Фёдоровна, ўз ўқувчилари билан навбатдаги масофавий дарсга кетишдан олдин.
Реклама ҳуқуқи асосида.
Изоҳ (0)