Андижон давлат хизматлари маркази сўнгги 40 кунда 3701 та янги тадбиркорлик субъектини рўйхатдан ўтказди. Шунингдек, карантин сабаб ишини тўхтатган 2300 нафар тадбиркорга фаолиятини қайта тиклаш учун рухсатнома берди, дея хабар берди «Дарё» мухбири.
ДХА Андижон вилоят бошқармаси ахборот хизматининг маълум қилишича, коронавирус инфекцияси тарқалишига қарши кучайтирилган тартиб жорий этилиши муносабати билан 25 мартдан буён вилоятдаги давлат хизматлари марказлари орқали кўрсатиладиган барча хизматлар электрон шаклда, кечиктириб бўлмайдиган ҳолатларда эса ходимларнинг навбатчилиги асосида амалга оширилмоқда.
ДХА вилоят бошқармаси бошлиғи ўринбосари Абдураҳмон Алимовнинг маълумот беришича, сўнгги 40 кунда давлат хизматлари марказлари орқали турли йўналишдаги 50 мингдан ортиқ мурожаатлар қабул қилинган. Айрим фуқароларга тегишли тартибда тушунчалар берилаётган бўлса, аксарият мурожаатчиларнинг иши муҳимлиги ҳисобга олиниб, карантин ва инфекция юқиши ҳамда тарқалишининг олдини олиш бўйича белгиланган тартибга амал қилинган ҳолда зарур хизматлар кўрсатилмоқда. Мурожаатларнинг асосий қисмини судланмаганлик, номида уй-жой мавжуд эмаслиги тўғрисида маълумотномалар олиш, кадастр, тадбиркорлик субъектини рўйхатдан ўтказиш ва қайта рўйхатдан ўтказиш сингари хизматлар ташкил этмоқда.
«Шу кунга қадар давлат хизматлари марказлари томонидан 3701 та янги тадбиркорлик субъектлари рўйхатдан ўтказилди. Уларнинг 2535 таси якка тартибдаги тадбиркор ҳисобланади. Шунингдек, карантинда фаолиятини тўхтатган 11 мингга яқин тадбиркорлик субъектларининг 2300 таси фаолиятини қайта тиклаш бўйича мурожаат қилган. Уларга тадбиркорлик гувоҳномалари расмийлаштирилиб берилди», — дейди бошқарма бош мутахассиси Фаррух Жалолов.
Маълум бўлишича, марказларда тадбиркорлик фаолиятини қайта тиклаш бўйича мурожаатлар давом этмоқда.
Изоҳ (0)