Россияда ўтган бир сутка ичида коронавирус билан касалланиш бўйича 11 012 та ҳолат қайд этилиб, касалланганларнинг умумий сони 209 688 кишига етди. Бу ҳақда тезкор штаб маълумотларида келтирилган.
Кунлик касалланишлар сони қаторасига 8 кундан буён 10 минг кишидан ошмоқда. Сутка давомида энг кўп касалланиш 7 май куни кузатилганди. Шу куни коронавирусга чалинган беморлар сони 11 231 кишига кўпайган.
Янги касалланганларнинг ярмидан кўпи — 5 551 нафари Москвада қайд этилган. Пойтахтда касалланганларнинг умумий сони 109,7 минг кишига етган. Ундан кейинги ўринларда Москва вилояти (20,5 минг киши) ва Санкт-Петербург (7 404 киши) турибди.
Шунингдек, сутка давомида беморларнинг 88 нафари вафот этиб, мамлакатда коронавирус қурбонлари сони 1 915 кишига етди. Касалликдан соғайганлар сони эса 34 306 кишини ташкил этмоқда.
Дунё бўйича эса коронавирусга чалинганлар сони 4 миллион кишидан ошиб кетди.
Изоҳ (0)