Хоразм вилоятида 14 нафар, Андижон вилоятида эса 7 нафар коронавирус билан хасталанган бемор бутунлай соғайиб, 6-март, чоршанба куни реабилитацияга кузатилди. Бу ҳақда Соғлиқни сақлаш вазирлиги хабар берди.
Хоразмда тузалганларнинг барчаси Россиядан чартер рейс билан олиб келинган ва карантинга олинган. Коронавирус инфекцияси тасдиқлангач, улар шифохонага жойлаштирилган. Тузалганлар орасида Наманган ва Самарқанд вилоятларидан 3 нафардан, Қашқадарё, Хоразм вилоятлари ва Тошкент шаҳридан 2 нафардан, Бухоро ва Жиззах вилоятларидан 1 нафардан фуқаро бор. Уларнинг 11 нафари эркак, 3 нафари аёл бўлиб, ёши энг каттаси 81 ёшли отахон бўлса, энг кичиги 16 ёшда. Хоразм вилоятида шу пайтга қадар 167 нафар бемор коронавирусдан бутунлай соғайди.
Андижонда дарддан фориғ бўлганларнинг барчаси ушбу вилоятдан бўлиб, улар коронавирус инфекциясига чалинганлар билан мулоқот орқали касалликни юқтириб олган. Уларнинг 5 нафари эркак, 2 нафари аёл бўлиб, ёши энг каттаси 53 ёшда, энг кичиги эса 15 ёшда. Андижон вилоятида шу пайтга қадар коронавирусдан тузалганлар сони 133 нафарга етди.
Ўзбекистонда 6 май куни 76 нафар бемор коронавирусдан тузалиб, мамлакат бўйича коронавирус инфекциясидан бутунлай соғайганлар сони 1577 нафарга етди.
Ўзбекистонда 6 май соат 17:00 ҳолатига кўра, коронавирус инфекциясини юқтириб олганлар сони 14 кишига ошиб, касалланганлар 2231 нафарга етди. Соғайган ва вафот этганлардан ташқари жами 644 нафар бемор айни пайтда даволанмоқда. Ўзбекистонда 15 мартдан буён коронавирусга чалинган беморларнинг 10 нафари вафот этди.
Изоҳ (0)