Сирдарё вилоятидаги Сардоба сув омбори билан боғлиқ фавқулодда вазият оқибатларини бартараф этиш мақсадида Ўзбекистон Президентининг маслаҳатчиси Турсинхон Худойберганов бошчилигидаги делегация Қозоғистоннинг Туркистон вилоятида фавқулодда вазиятдан зарар кўрган ҳудудларни бориб кўрди. Бу ҳақда Ўзбекистон Фавқулодда вазиятлар вазирлиги хабар берди.
Маълум қилинишича, Ўзбекистон делегацияси Туркистон вилоятида сув тошқини натижасида юзага келган фавқулодда вазият оқибатларини яна бир карра ўрганди ва зарур тадбирлар белгилаб олинди.
Вазирликнинг қайд этишича, фавқулодда вазият оқибатларини бартараф этиш учун Ўзбекистон тарафидан 209 нафар шахсий таркиб, 169 та қишлоқ хўжалиги, муҳандислик ва ёнғин-қутқарув техникасидан иборат қўшимча куч ва воситалар Туркистон вилоятига етиб борган.
«Ҳозирда фавқулодда вазиятлар оқибатларини бартараф этиш ишлари уюшқоқлик билан олиб борилмоқда», — дейилади вазирлик хабарида.
Эслатиб ўтамиз, Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинганди. Сўнгги маълумотларга кўра, тошқин натижасида вилоят ҳудудида 30 мингдан ортиқ одам эвакуация қилинган. Мазкур фавқулодда ҳолатни муҳокама қилиш учун Қозоғистон расмийлари Ўзбекистонга ташриф буюрди.
Ўзбекистон Президенти Шавкат Мирзиёев 5 май, сешанба куни бўлиб ўтган видеоселектор йиғилишида Ўзбекистон ҳукумати Сардоба сув омборидаги фалокат сабаб қўшни мамлакатда юз берган сув тошқинлари оқибатларини бартараф этишда қозоғистонлик ҳамкасблари билан яқиндан ҳамкорлик қилишини билдирди.
Мавзуга доир:
- Қозоғистон ТИВ: Сув тошқини юзасидан Ўзбекистонга нота юборилмайди
- Қозоғистон Ўзбекистон билан чегарани очмоқчи — ўзбекистонлик мутахассислар тошқин оқибатларини бартараф этишда ёрдам бериши учун
- Громов: Ўзбекистон сув хўжалиги вазири ўринбосари қўнғироқ қилиб, сув Қозоғистонга ўтмаслигини таъкидлаган эди
- Қозоғистон ҳукумати вакили: Ўзбекистон Сардоба сув омборининг қурилишини биз билан келишмаган
Изоҳ (0)