АҚШда COVID-19 сабаб қайд этиладиган ўлим ҳолатлари янада кўпайиши прогноз қилинди

АҚШ администрацияси 1 июнга бориб COVID-19’дан вафот этган мамлакат фуқароларининг сони икки баравар кўпайишини тахмин қилмоқда. Бу ҳақда The New York Times нашри администрациядаги ички ҳужжатларга асосланиб хабар тарқатган.

Маълумотларга кўра, ой бошида коронавирусдан 3 минг нафарга яқин одам вафот этади, ҳозирда кунига 1750 нафар киши COVID-19 оқибатида ҳаётдан кўз юммоқда. Газетанинг ёзишича, ҳозир касалликка чалиниш бўйича кунига 25 мингта янги ҳолат қайд этилаётган бўлса, бир ойдан кейин кунига 200 минг кишида касалланиш кузатилади.

Прогноз CDC санитария ташкилотининг статистик моделлаштириш назариясига асосланган. АҚШ президенти Дональд Трамп ушбу тахминларга қарама-қарши ўлароқ тақиқларни босқичма-босқич юмшатишга ўтган.

Аксарият штатларда март ўрталарида эълон қилинган карантинга қарамай АҚШда коронавирус билан боғлиқ эпидемиологик вазият ижобий томонга ўзгармаяпти. Мамлакатда 1,1 миллиондан кўпроқ одам вирусга чалинган, 67 мингдан кўпроқ бемор касаллик оқибатида вафот этган. АҚШ иккала кўрсаткич бўйича ҳам жаҳонда етакчилик қилмоқда.

Тахминларга кўра, карантин чекловларининг юмшатилиши вирус билан боғлиқ вазиятнинг баттар ёмонлашишига олиб келади.

Дональд Трамп 3 майда АҚШда коронавирусдан вафот этувчилар сони ҳақидаги прогнозида кўрсатган рақамни каттароғига алмаштирган. У аввал 60-65 минг атрофида одам касалликдан ўлади деган бўлса, Fox News’га берган интервьюсида вафот этганларнинг сони 75-100 мингга яқин бўлишини тахмин қилган.