Тожикистонда бир сутка ичида коронавирусга чалинган беморлар сони 102 нафарга ошди ва 230 нафарга етди, уч нафар бемор касаллик оқибатида ҳаётдан кўз юмган. Бу ҳақда мамлакат Соғлиқни сақлаш вазирлиги ахборотига таяниб, «РИА Новости» хабар берди.
«Тожикистонда COVID-19’ни юқтириб олганларнинг умумий сони 230 нафарга етди, бу 2 май ҳолатидаги кўрсаткичдан 102 нафарга кўп дегани. Уч киши касаллик оқибатида вафот этган», — дея агентликка маълум қилган вазирлик вакили.
Унинг сўзларига кўра, 4 май ҳолати бўйича 3208 нафар киши мамлакатдаги касалхоналарда тиббий кузатув остига олинган. Бир сутка ичида 246 нафар одам қониқарли ҳолатда шифохоналардан чиқарилган.
230 та COVID-19 билан касалланиш ҳолатининг 110 таси Душанбе шаҳрида, 22 таси республика бошқарувига бўйсунувчи шаҳарлар ва туманларда, 7 таси Тоғли-Бадахшон мухтор вилоятида, 21 таси Хатлон вилоятида ва яна 70 таси Сўғд вилоятида қайд этилган.
Тожикистонда коронавирус билан касалланиш бўйича дастлабки ҳолатларнинг қайд этилгани 30 апрелда эълон қилинган: Соғлиқни сақлаш вазирлиги 15 нафар одамнинг COVID-19’га чалинганини хабар қилган. Уларнинг 10 нафари Сўғд вилоятида, 5 нафари эса Душанбеда экани айтилганди.
2 май тонгида касалланганлар сони 32 нафарга етган, 2 май оқшомига бориб уларнинг сони 76 нафарни ташкил қилган. 3 май оқшомида мамлакатда COVID-19’ни юқтириб олганлар 128 нафарга етгани ҳамда 2 киши вафот этгани хабар қилинган.
Изоҳ (0)