Бухоро вилоятининг Қоровулбозор туманида жойлашган жазони ижро этиш колониясида умрбодга қамалган 73 нафар маҳкумнинг жазоси енгиллаштирилди. Улар махсус ҳисобдан чиқарилиб, қаттиқ тартибли колонияга ўтказилди. Бу ҳақда «Дарё»га Жиноят ишлари бўйича Қоровулбозор туман суди раиси Маҳмуд Орипов маълум қилмоқда.
Таъкидланишича, жазони ижро этиш колонияси маъмурияти инсонпарварлик тамойилига амал қилган ҳолда умрбод қамоқ жазосини ўтаётган 73 нафар маҳкумга нисбатан сақлаш шароитини ўзгартириш тўғрисида Жиноят ишлари бўйича Қоровулбозор туман судига тақдимнома киритган.
Жорий йилнинг 30 апрель куни ушбу колонияда карантин қоидаларига амал қилинган ҳолда суд йиғилиши ўтказилган. Суд қарорига кўра, 73 нафар маҳкумга Жиноят ижроия кодексининг 104-моддаси 1-банди (Интизомий жазоси йўқ маҳкумларнинг сақлаш шароитини ўзгартириш билан боғлиқ рағбатлантириш чораларини қўллаш тартиби) ҳамда Жиноят процессуал кодексининг 537-моддаси (Озодликдан маҳрум этиш жазосига ҳукм қилинган шахсларни сақлаш шароитини жазони ўташ вақтида ўзгартириш) қўлланилган. Икки нафар маҳкумга нисбатан эса маъмурий назорат ўрнатиш тўғрисида қарор чиқарилган.
«Бухородаги 17-сонли жазони ижро этиш колонияси махсус тартибли колония бўлиб, бу колония озодликдан маҳрум қилиниб, ўта хавфли рецидивист деб топилган, шунингдек, умрбод озодликдан маҳрум қилинган маҳкумларни сақлаш учун мўлжалланган. Махсус тартибли колониялардаги маҳкумлар камераларда ёки умумий яшаш биноларида яшаб, ҳар ойда бир марта озиқ-овқат маҳсулотлари ва энг зарур нарсалар сотиб олиши, йил мобайнида икки марта қисқа муддатли учрашув, уч марта телефон орқали сўзлашув, учта посилка ва учта бандероль олиш ҳуқуқига эга. Ижобий тавсифга эга маҳкумлар эса муддатни Жиноят ижроия кодексининг 104-моддасида назарда тутилган тартибда, яъни жазони енгиллаштирилган сақлаш шароитида ўтказади», — дейди 17-сон Жазони ижро этиш колонияси бўлими бошлиғи, майор Жасур Пўлатов.
Шу куни ҳуқуқ-тартибот идоралари вакиллари колонияда жазо муддатини ўтаётган маҳкумлар билан суҳбат ўтказган. Маҳкумлар томонидан берилган саволларга жавоб берилиб, содир этилган жиноий қилмишларининг салбий оқибатлари, оиласига ва жамиятга қанчалик зарар етказганлиги тушунтириб ўтилган.
Изоҳ (0)