Самарқанд шаҳар халқ таълими бўлимида ўтказилган ўрганишда марказлашган бухгалтерия ходимлари 2018—2019 йиллар давомида 870 миллион сўм маблағни нотўғри сарфлагани маълум бўлди. Бу ҳақда ҳисоб палатаси ҳамда халқ таълими вазирлиги томонидан ўтказилган текширув хулосаларида маълум қилинган, дея хабар беради «Дарё» мухбири Фарҳод Норбўтаев.
Самарқанд прокуратураси ахборот хизматининг маълумот беришича, Самарқанд шаҳар ХТБ томонидан 2019 йилнинг июнь-сентябрь ойларида моддий ёрдам пули бериш ҳақида буйруқ чиқарилмаган мактаб ходимларига исм-шарифини кўрсатмасдан, асоссиз равишда 160 миллион сўм моддий ёрдам пули тўлаб берилган.
Шунингдек, бўлимнинг марказлашган бухгалтерияси томонидан 158 миллион сўм миқдордаги бюджет маблағлари шаҳар давлат солиқ инспекциясига мол-мулк солиғи учун тўлаб берилган. 2019 йил 30 июнида эса ичимлик суви ва оқова сувдан бўлган қарздорлик учун 16 миллион сўм ўтказилиб, жами 174 миллион сўм растрата қилинган.
Аниқланишича, бўлим марказлашган бухгалтерияси ҳисобчилари шаҳардаги 20 та мактабда ишга келмаган, касаллик варақаси бўлган ва бошқа сабабларга кўра иқтисод қилинган 674 миллион 729 минг сўм пулни ушбу таълим муассасаларида ишламаган, ишдан бўшаб кетган ҳамда ишлаб турган баъзи ходимлар номига ҳеч бир асоссиз тўлаб берган.
Самарқанд шаҳар прокуратураси томонидан шаҳар ХТБ ходимларига нисбатан Жиноят кодексининг 167-моддаси 3-қисми «а» банди (Ўзлаштириш ёки растрата йўли билан талон-торож қилиш) билан жиноят иши қўзғатилган. Ҳозирда тергов суриштирув жараёнлари олиб борилмоқда.
Эслатиб ўтамиз, бундан аввал Самарқанд вилоят халқ таълими бошқармаси, Пайариқ ҳамда Иштихон туман халқ таълими бўлими ҳисобчилари бюджет маблағларини талон-торож қилгани ҳақида хабар берилганди.
Изоҳ (0)