Американинг Шимолий Каролина штатида 9 ёшдан 16 ёшгача бўлган болалар дилерлик марказларидан 1 138 718 долларлик 46 та автомобилни ўғирлаб қочди, деб хабар беради Motor.
Уинстон-Сейлем шаҳри полицияси маҳаллий дилерларни ўмарган машина ўғриларининг изига тушишга муваффақ бўлган. 17 мартдан бошлаб жиноятчилар 12 та дилерлик марказидан 46 та янги машинани олиб қочишга эришган бўлса, яна 6 та дилерлик марказига уюштирилган ҳужум турли сабабларга кўра, муваффақиятсиз якунланган. Аниқланишича, машиналарни 9 ёшдан 16 ёшгача бўлган болалар ўғирлаган. Вояга етмаганлардан иборат жиноий тўда дилерларга 1 138 718 доллар миқдорида зарар етказган.
19 нафар боладан иборат тўда томонидан ўғирланган жами 46 та машинанинг 6 таси топилмаган. Болалар вояга етмаганлиги сабаб уларни ҳибсга олиш мумкин эмас. Бироқ полициячилар 19 ёшли эркакни машина ўғрилари билан алоқадорликда гумон қилиб қўлга олган — унинг гаражидан ўғирланган автомобиллардан бири топилган ва у қўлга олиш жараёнида қаршилик кўрсатган. Тахминларга кўра, барча жиноятларнинг ташкилотчиси ва тўданинг «каттаси» шу бўлиши мумкин.
Изоҳ (0)