Сирдарё вилоятида 1 май, жума куни, юз берган табиий офат оқибатларини тезда бартараф этиш учун қўшимча кучларни сафарбар этиш давом эртмоқда. Бу ҳақда ФВВ матбуот хизмати хабар берди.
Қайд этилишича, 3 май куни ҳодиса жойига вазирликнинг яна 400 нафар ходими ва 200 га яқин махсус техникалар, жумладан, ўт ўчириш машиналари ва сувларни тортиб олувчи мотонасослар етиб борган.
Бундан ташқари, Мудофаа вазирлиги, Ички ишлар вазирлиги, Миллий гвардия ва фавқулодда вазиятларда уларнинг олдини олиш ва ҳаракат қилиш давлат тизимининг бошқа хизматчилари кучлари ва воситалари жалб этилади.
Эслатиб ўтамиз, Сардобадаги сув тошқинидан Қўрғонтепа ва Дўстлик аҳоли яшаш пунктлари жиддий зарар кўрди. Ижтимоий тармоқларда тошқин оқибатида турар жой бинолари бузилгани, мол-ҳол сувда оқиб кетаётгани акс этган видеоёзувлар тарқалганди.
Айни пайтда ҳодиса юзасидан жиноят иши қўзғатилган. Тергов ҳаракатларини ДХХ олиб боради.
Маълумот учун, содир бўлган фавқулодда вазият юзасидан ФВВда call-марказ фаолияти йўлга қўйилган. Ташкил этилган тезкор рақам кучайтирилган тартибда ишламоқда. Қўнғироқлар 1205 ва 1250 қисқа телефон рақамлари орқали қабул қилинмоқда.
Изоҳ (0)