Шимоли-ғарбий ҳарбий округ қўшинлари қўмондонлигининг буйруғи билан 3 май, якшанба куни, тонгда 300 нафардан зиёд ҳарбий хизматчилар ҳамда 10 дан ортиқ ҳарбий техникалар Сирдарё вилоятида Сардоба сув омбори тўғонининг ўпирилиши оқибатида юзага келган фавқулодда ҳодиса оқибатларини бартараф этиш мақсадида шошилинч йўлга чиқди.
Шимоли-ғарбий ҳарбий округ матбуот хизматининг «Дарё»га маълум қилишича, ҳарбий ва махсус техникалар темир йўл платформаларига юкланган ҳолда Нукус шаҳридан транспортировка қилинмоқда.
Ҳарбий хизматчилар эса махсус рейсга қўйилган поездда йўлга чиққан.
Таъкидланишича, Мудофаа вазирлигининг барча ҳарбий округ қўшинлари қўмондонликлари Сирдарёда юзага келган вазиятда амалий ёрдам бериш мақсадида ҳарбий хизматчилар ва ҳарбий техникаларни юборишни бошлаган.
Аввалроқ Тошкентда сув тошқинидан жабр кўрган сирдарёликларга гуманитар ёрдам тўплаш маркази ташкил қилингани, ёрдам фақат юк ташиш машиналарида етказилиши хабар берилган эди. Сирдарё вилояти аҳолисига нафақат Тошкент шаҳридан, балки Ўзбекистоннинг бошқа ҳудудларидан ҳам ёрдам юклари юборилмоқда. Хусусан, Қашқадарё ва Андижон вилоятларидан ҳам ёрдам юклари юборилган.
Эслатиб ўтамиз, Сирдарёда 1 май, жума куни, тонгда Сардоба сув омбори тўғони пикетларидан бирининг ёрилиб кетиши оқибатида сув тошқини юз берган; 2 май тонгги ҳолатига кўра, 70 мингга яқин аҳоли хавфсиз ҳудудга кўчирилган, камида 56 киши турли тан жароҳатлари билан касалхоналарга ётқизилган.
Изоҳ (0)