Бухоро вилоятида коронавирусга чалинган навбатдаги 7 нафар бемор тўлиқ соғайди ва вилоят соғлиқни сақлаш бошқармаси масъуллари иштирокида реабилитацияга кузатилди, деб хабар бермоқда Соғлиқни сақлаш вазирлиги.
Тузалганларнинг ҳаммаси Россиядан чартер рейс билан Бухорога олиб келинган ва карантинга олинган. Уларда коронавирус инфекцияси борлиги тасдиқлангач, шифохонага жойлаштирилган.
Касалликдан фориғ бўлганларнинг 2 нафари Фарғонадан, Жиззах, Бухоро, Қашқадарё ва Андижон вилоятлари ва Тошкент шаҳридан 1 нафардан. Уларнинг барчаси эркак, энг ёши каттаси 41 да бўлса, энг кичиги 16 ёшда.
Бухоро вилояти бўйича шу пайтга қадар 325 нафар бемор соғайганди, энди уларнинг сони 332 нафарга етди.
2020 йил 3 май соат 14:30 ҳолатига кўра Ўзбекистонда COVID-19 инфекциясидан соғайганлар сони 1278 нафарни ташкил қилган.
Аввал 3 май соат 15:00 ҳолатига кўра, коронавирус инфекциясини юқтириб олганлар сони 2136 нафарни ташкил этгани маълум қилинганди.
Ўзбекистонда 15 мартдан буён коронавирусга чалинган беморларнинг ўн нафари вафот этди.
Қайд этиш жоиз, 28 апрелдан буён соғайганлар сони айни вақтда касалликдан даволанаётганлар сонидан кўп бўлиб турибди.
Изоҳ (0)