Европа космик агентлигининг Sentinel-3 фазо аппарати тасвирлари Сардоба сув омбори ўпирилиши оқибатида сув кетишининг кўламини фазодан кўрсатиб беради, деб ёзмоқда @davletovuz. Таққослаш учун 19 апрелда ва 2 майда олинган суратлари келтирилган.
Унда сув тошқини қанча ҳудудларга кириб борганини кўриш мумкин.
Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган. Мутахассисларнинг фикрича, сув омбори тўғони бузилиб, сув тошиб чиқишига кучли ёмғир ва шамол сабаб бўлган. 2 май тонги ҳолатига кўра, 70 мингга яқин аҳоли хавфсиз ҳудудга кўчирилган, камида 56 киши турли тан жароҳатлари билан касалхоналарга ётқизилган.
Тошқин оқибатларини бартараф этиш учун сув оқимлари Оқолтин тумани ҳудудидан ўтувчи Абай каналига туширилиб, Жиззах вилоятидаги Арнасой кўлига йўналтирилган. Бунинг оқибатида Қозоғистоннинг Мақтаарал вилоятининг чегара коллекторлари сув билан тўлиб, сув оқими секундига 180 кубометр бўлгани туфайли коллектордан сув тошиб, Жанажол қишлоқ округига қарашли Женис ва Энбекши қишлоқ округига қарашли Жанатурмис шаҳарчасида сув тошқини юзага келган ва у ердан ҳам минглаб аҳоли эвакуация қилинган. Қозоғистон расмийларининг айтишича, Ўзбекистон сув хўжалиги вазири сув оқими тўхтаганини таъкидлаган, бироқ сув оқими келиши тўхтамаяпти ва яна бир қишлоқ сув остида қолган.
Изоҳ (0)