Андижон вилояти ҳокимлиги ҳам тошқиндан жабрланган сардобаликлар учун инсонпарварлик ёрдами юборди, дея хабар беради «Дарё» мухбири.
Фото: Шерзод Сотволдиев
Таъкидланишича, сардобаликларни қўллаб-қувватлаш мақсадида юборилган кўмак карвони орқали 12 тоннадан ортиқ озиқ-овқат маҳсулотлари тўплами, 35 мингта тиббий ниқоб, 10 минг дона бир марталик идиш ҳамда 145 мингдан ортиқ кийим-кечак юборилган.
Фото: Шерзод Сотволдиев
«Ушбу ҳудуддаги фавқулодда ҳолатни бартараф этишда кўмаклашиш мақсадида тайёргарлик кўрилмоқда. Биз бундай қийин шароитида сирдарёликларни қўллаб-қувватлаш ва уларга ёрдам кўрсатишга тайёрмиз», — дейди Андижон вилояти ҳокими Шуҳрат Абдураҳмонов.
Фото: Шерзод Сотволдиев
Аввалроқ тошқиндан жабрланган сардобаликлар учун Самарқанд ҳамда Қашқадарёдан инсонпарварлик ёрдами йўлга чиққани ҳақида хабар берилганди.
Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келган. Авариядан сўнг 70 мингга яқин фуқаро эвакуация қилинди.
ФВВ матбуот хизмати вакили Самандар Ҳикматуллаевнинг маълум қилишича, Сардоба, Оқолтин, Мирзаобод туманларидаги 22 та аҳоли пунктларидан жами 60 450 нафар фуқаро Сирдарё вилоятининг бошқа ва Жиззах вилояти ҳудудларига вақтинчалик кўчирилган.
