Andijon viloyati hokimligi ham toshqindan jabrlangan sardobaliklar uchun insonparvarlik yordami yubordi, deya xabar beradi “Daryo” muxbiri.
Ta’kidlanishicha, sardobaliklarni qo‘llab-quvvatlash maqsadida yuborilgan ko‘mak karvoni orqali 12 tonnadan ortiq oziq-ovqat mahsulotlari to‘plami, 35 mingta tibbiy niqob, 10 ming dona bir martalik idish hamda 145 mingdan ortiq kiyim-kechak yuborilgan.
“Ushbu hududdagi favqulodda holatni bartaraf etishda ko‘maklashish maqsadida tayyorgarlik ko‘rilmoqda. Biz bunday qiyin sharoitida sirdaryoliklarni qo‘llab-quvvatlash va ularga yordam ko‘rsatishga tayyormiz”, — deydi Andijon viloyati hokimi Shuhrat Abdurahmonov.
Avvalroq toshqindan jabrlangan sardobaliklar uchun Samarqand hamda Qashqadaryodan insonparvarlik yordami yo‘lga chiqqani haqida xabar berilgandi.
Eslatib o‘tamiz, 1 may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgan. Avariyadan so‘ng 70 mingga yaqin fuqaro evakuatsiya qilindi.
FVV matbuot xizmati vakili Samandar Hikmatullayevning ma’lum qilishicha, Sardoba, Oqoltin, Mirzaobod tumanlaridagi 22 ta aholi punktlaridan jami 60 450 nafar fuqaro Sirdaryo viloyatining boshqa va Jizzax viloyati hududlariga vaqtinchalik ko‘chirilgan.
Izoh (0)