Сардоба сув омборидан сув чиқиши ҳозирда камайган. Бу ҳақда Фавқулодда вазиятлар вазирлиги 1 май куни соат 15:23 да эълон қилган ахборотида маълум қилди.
Вазирликдан маълум қилишларича, тошқин оқибатларини бартараф этиш учун сув оқимлари Оқолтин тумани ҳудудидан ўтувчи Абай каналига туширилиб, Жиззах вилоятидаги Арнасой кўлига йўналтирилган.
«Ҳозирда дамбадан сув чиқиши камайган», — дейилади вазирлик ахборотида. Ижтимоий тармоқларда тўғоннинг бузилган қисмидан сув чиқиб келаётгани акс этган видеоёзувлар тарқалмоқда.
Қайд этишларича, авария ҳудудида фавқулодда вазият оқибатларини бартараф этиш ишлари давом эттирилмоқда. Аввалроқ воқеа жойига Президент Шавкат Мирзиёев ва бош вазир Абдулла Арипов етиб боргани ҳақида хабар берилган эди.
