Бухоро вилоятида коронавирусга чалинган навбатдаги 25 нафар бемор тўлиқ соғайди. Улар вилоят Соғлиқни сақлаш бошқармаси масъуллари иштирокида реабилитацияга кузатилди. Бу ҳақда Соғлиқни сақлаш вазирлиги хабар берди.
Шифо топганларнинг 22 нафари Россиядан, 1 нафари эса Туркиядан чартер рейс билан Бухорога олиб келинган ва карантинга олинган. Коронавирус инфекцияси тасдиқлангач, улар шифохонага жойлаштирилган. Қолган 2 нафар бемор коронавирусга чалинганлар билан мулоқот орқали касалликни юқтириб олган.
Соғайганлар орасида Бухоро, Самарқанд, Қашқадарё вилоятлари ва Тошкент шаҳридан 4 нафардан, Сурхондарё вилоятидан 3 нафар, Хоразм, Андижон, Наманган ва Сирдарё вилоятларидан 1 нафардан фуқаро ҳамда Қирғизистон Республикасининг 2 нафар фуқароси ҳам бор. Уларнинг 19 нафари эркак, 6 нафари аёл бўлиб, энг каттаси 55 ёшда, энг эса кичиги 15 ёшда.
Бухоро вилояти бўйича шу пайтга қадар коронавирусдан соғайган беморлар сони 325 нафарга етди.
Шу пайтга қадар Ўзбекистон бўйича коронавирус инфекциясидан соғайган беморлар сони эса 1159 нафарга етди.
Аввалроқ Қашқадарёда коронавирусга чалинган барча бемор соғайгани ҳақида хабар берилган эди.
Ўзбекистонда 1 май соат 10:00 ҳолатига кўра, коронавирус инфекциясини юқтириб олганлар сони 7 кишига кўпайиб, 2046 нафарга етди. Мамлакатда 15 мартдан буён коронавирусга чалинган беморларнинг тўққиз нафари вафот этди, шунингдек, 28 апрелдан буён соғайганлар сони айни вақтда касалликдан даволанаётганлар сонидан кўп бўлиб турибди.
Изоҳ (0)