АҚШ ҳукумати махсус хизмат вакилларини Ухандаги лабораториянинг COVID-19’га алоқадорлиги бўйича далиллар излашга мажбурламоқда

АҚШ президенти Дональд Трамп администрациясининг юқори мартабали амалдорлари махсус хизмат вакилларига COVID-19 коронавирусининг келиб чиқиши Ухандаги лаборатория билан боғлиқлигини аниқлаш ва бу борада далиллар топишни буюрган, деб ёзмоқда  The New York Times газетаси.

Трамп аввал ҳам коронавирус Хитойнинг Ухань шаҳрида сунъий равишда яратилгани ҳақида гапирган ва АҚШнинг буни исботлашга ҳаракат қилишини билдирганди. АҚШ президенти Пекин атайин COVID-19’ни тарқатгани аниқланса, у ҳолда Хитойга нисбатан жиддий чоралар кўрилишини қайд этган.

Хитой ТИВ эса мамлакат бошиданоқ коронавирус ҳақидаги маълумотларни очиқ тақдим қилгани ва ушбу позицияда шаффофликка интилганини таъкидлаган.

The New York Times нашри манбаларининг қайд этишича АҚШ разведка хизматларига бу борадаги босим АҚШ давлат котиби Майкл Помпео томонидан ўтказилмоқда. Шунингдек, аввал Пекинда журналист сифатида ишлаган, миллий хавфсизлик масалалари бўйича маслаҳатчи ўринбосари Мэтт Поттингер ҳам январь ойидан бери вақти-вақти билан Ухандаги лаборатория билан боғлиқ назарияга алоқадор ҳар қандай маълумотни топиш юзасидан топшириқлар бериб турган. Давлат департаменти ва миллий хавфсизлик кенгаши бу борадаги маълумотларга изоҳ бермаган.

Нашрнинг ёзишича, разведка масалалари соҳасидаги айрим таҳлилчилар президент ва администрациясининг бундай босими ёмон оқибатларга олиб келиши мумкинлигини билдирган. Разведка идораларидаги кўплаб мутахассислар лаборатория билан боғлиқ далиллар топилишига шубҳа билан қарамоқда.

NBC News телеканали АҚШ президенти Дональд Трамп администрациясининг ўтган ҳафтада Мудофаа вазирлигининг разведка бошқармасига Хитой ҳамда ЖССТнинг COVID-19 пандемияси бошланишини яширгани борасидаги маълумотларни текширишни буюрганини хабар қилганди.

Россия Федерацияси хавфсизлик кенгаши раисининг ўринбосари Дмитрий Медведов «РИА Новости»га берган интервьюсида вируснинг келиб чиқиш сабабини аниқлаш қийин бўлиши ва вирусларнинг Ердаги энг қадимги «биологик агентлар» эканини таъкидлаганди.

Австралия ТИВ раҳбари Марис Пейн эса коронавирус пандемияси бошланишининг сабабларини ўрганиш зарурий чоралардан бири эканини қайд этган.

Германия иқтисодий ҳамкорлик ва ривожланиш вазири Герд Мюллер эса Пекинни вируснинг келиб чиқиш сабабларини очиқ-ошкор айтишга чақирган. АҚШ Сенати ички хавфсизлик ва ҳукумат ишлари бўйича қўмитасининг раиси Рон Жонсон коронавируснинг келиб чиқиш ва тарқалиши, шунингдек Хитой ҳамда ЖССТнинг ушбу жараёндаги ўрни тафтиш қилинишини айтиб ўтган.