Россия бош вазири Михаил Мишустин коронавирус билан касалланган. Бу ҳақда унинг ўзи Россия президенти Владимир Путин билан суҳбатда маълум қилган. Meduza бош вазирнинг коронавирус юқтириб олгани ва Россия ҳукуматида ушбу воқеадан кейин бўлган, кутилиши тахмин қилинаётган воқеалар ҳақида маълумот берди.
«Ҳозиргина коронавирусга мен топширган тест ижобий натижа берибди. Шу муносабат билан ҳамкасбларимга касал юқмаслиги учун ‘Роспотребнадзор’ талабига риоя қилган ҳолда ‘ўзини яккалаш’ тартибига ўтишим, шифокорлар талабларини бажаришим зарур», — деган Мишустин Путин билан суҳбат чоғида.
Мишустин касалликнинг қайси босқичда экани ҳақида гапирмаган. «Эхо Москви» бош муҳаррири Алексей Венедиктов Telegram’даги каналида бош вазирнинг иситмаси баланд бўлиб, ҳарорати 39 даражада эканини хабар қилган. Мишустиннинг матбуот котиби Борис Беляков ҳукумат раҳбарининг тиббиёт муассасасида даволанишини маълум қилган.
Мишустин йўқлигида бош вазир вазифасини вақтинча бажариш унинг биринчи ўринбосари Андрей Белоусов зиммасига юкланди. Мишустиннинг ўзи ушбу номзодни тавсия қилган ва ҳукуматнинг иши ўз тартибида давом этишини билдирган. Мишустин коронавирусга чалинганини эълон қилганидан ярим соат ўтар-ўтмай Путин Белоусовни вақтинча бош вазир лавозимига тайинлаш ҳақидаги фармонни имзолагани эълон қилинган.
Meduza’нинг Россия ҳукуматига яқин суҳбатдоши Михаил Мишустиннинг бош вазир курсисини қайта эгалламаслиги мумкинлигини инкор этмади. У бош вазир вазифасини бажариш Андрей Белоусов зиммасига Президент фармони билан юклатилганига эътибор қилган. Россия ҳукумати тўғрисидаги федерал конституцион қонуннинг 8-моддаси бўйича бош вазир йўқлигида унинг ўринбосарларидан бири ҳукуматга раҳбарлик қилади ва ваколатни топшириш учун алоҳида Президент фармони имзоланиши шарт эмас (ваколатларни тақсимлаш бўйича ёзма расмийлаштириш талаб қилинади холос). Бош вазир вазифасини бажариш бўйича Президент фармони амалдаги ҳукумат раҳбари лавозимни тарк этган тақдирдагина қабул қилинади ва ўринбосарларидан бири-икки ой муддатга ижро органига раҳбарлик қилади. Бундан ташқари фармон матнида вазифасини вақтинчалик бажарувчи деган сўз бирикмаси умуман ишлатилмаган. Бунга қадар бош вазирлар таътилга чиққан ёки касал бўлган вақтида алоҳида Президент фармони чиқарилмаган. Бошқа томондан олганда эса бош вазир истеъфоси ҳукуматнинг ҳам тарқатиб юборилишини англатади, Путин билан видеоалоқа тарзидаги мулоқотда Мишустин Вазирлар маҳкамасининг ўз тартибида ишлашда давом этишига урғу берди. Бундай ҳолатда Президент фармонини «ёзма равишда ваколатларнинг бўлиб берилиши» сифатида баҳолаш мумкин, унга кўра Белоусов бош вазир йўқлигида унинг вазифаларини бажариб туради.
Президент администрациясига яқин бошқа бир манба ҳам Мишустин соғайганидан кейин бошқа лавозимга ўтишини тахмин қилган.
«У собиқ солиқчи сифатида молиявий оқимлар қаерга ва қандай кетишини яхши билади, бироқ Мишустин бошқа мақсадда ижро органи раҳбари бўлганди, яъни миллий лойиҳалар учун маблағлар қаерга сарфланаётганини назорат қилиши керак эди, энди инқироз сабаб бюджетда муаммолар мавжуд. Ҳозир вазият бошқача, иқтисодиёт пандемия сабаб ўтириб қолган ва уни турғазиш зарур. Мишустин бу ишни уддалайдиган одам эмас. Хато қилмади, шунчаки ҳозир унинг вақти эмас», — дея Meduza’га фикрларини билдирган суҳбатдош.
Администрациядаги бошқа бир киши эса бош вазирнинг ўз лавозимига қайтишини тахмин қилди.
Россия Федерацияси президентининг матбуот котиби Дмитрий Песков ҳам ушбу воқеаларга муносабат билдириб, Мишустиннинг тузалганидан кейин бош вазирликка қайтмаслиги ҳақидаги хабарларни сафсата деб атади.
Мишустиннинг сўнгги вақтларда қайси амалдорлар билан бевосита кўришиб гаплашгани ҳақида ҳам расмий маълумот берилмаган. Бош вазир матбуот котиби Борис Беляков мулоқотда бўлганлар кўп эмаслиги ва уларнинг барчаси изоляция қилингани ҳамда тест топширишини билдирган.
Ҳукуматдаги манба Вазирлар маҳкамасида ходимларнинг аксар қисми масофадан ишлашга ўтгани ва бош вазир билан бевосита мулоқот қилувчиларнинг сони камлигини тасдиқлаган. Ҳукуматда охирги вақтларда ўтказилган мажлисларнинг ҳаммаси видеоконференцалоқа тарзида бўлиб ўтган, Мишустин уларда билвосита Оқ уйдаги кабинетидан туриб раислик қилган. Ҳукумат уйидаги барча ходимлар ҳар куни коронавирусга тест топшириб турган.
Изоҳ (0)