AQSh hukumati maxsus xizmat vakillarini Uxandagi laboratoriyaning COVID-19’ga aloqadorligi bo‘yicha dalillar izlashga majburlamoqda

AQSh prezidenti Donald Tramp administratsiyasining yuqori martabali amaldorlari maxsus xizmat vakillariga COVID-19 koronavirusining kelib chiqishi Uxandagi laboratoriya bilan bog‘liqligini aniqlash va bu borada dalillar topishni buyurgan, deb yozmoqda  The New York Times gazetasi.

Tramp avval ham koronavirus Xitoyning Uxan shahrida sun’iy ravishda yaratilgani haqida gapirgan va AQShning buni isbotlashga harakat qilishini bildirgandi. AQSh prezidenti Pekin atayin COVID-19’ni tarqatgani aniqlansa, u holda Xitoyga nisbatan jiddiy choralar ko‘rilishini qayd etgan.

Xitoy TIV esa mamlakat boshidanoq koronavirus haqidagi ma’lumotlarni ochiq taqdim qilgani va ushbu pozitsiyada shaffoflikka intilganini ta’kidlagan.

The New York Times nashri manbalarining qayd etishicha AQSh razvedka xizmatlariga bu boradagi bosim AQSh davlat kotibi Maykl Pompeo tomonidan o‘tkazilmoqda. Shuningdek, avval Pekinda jurnalist sifatida ishlagan, milliy xavfsizlik masalalari bo‘yicha maslahatchi o‘rinbosari Mett Pottinger ham yanvar oyidan beri vaqti-vaqti bilan Uxandagi laboratoriya bilan bog‘liq nazariyaga aloqador har qanday ma’lumotni topish yuzasidan topshiriqlar berib turgan. Davlat departamenti va milliy xavfsizlik kengashi bu boradagi ma’lumotlarga izoh bermagan.

Nashrning yozishicha, razvedka masalalari sohasidagi ayrim tahlilchilar prezident va administratsiyasining bunday bosimi yomon oqibatlarga olib kelishi mumkinligini bildirgan. Razvedka idoralaridagi ko‘plab mutaxassislar laboratoriya bilan bog‘liq dalillar topilishiga shubha bilan qaramoqda.

NBC News telekanali AQSh prezidenti Donald Tramp administratsiyasining o‘tgan haftada Mudofaa vazirligining razvedka boshqarmasiga Xitoy hamda JSSTning COVID-19 pandemiyasi boshlanishini yashirgani borasidagi ma’lumotlarni tekshirishni buyurganini xabar qilgandi.

Rossiya Federatsiyasi xavfsizlik kengashi raisining o‘rinbosari Dmitriy Medvedov “RIA Novosti”ga bergan intervyusida virusning kelib chiqish sababini aniqlash qiyin bo‘lishi va viruslarning Yerdagi eng qadimgi “biologik agentlar” ekanini ta’kidlagandi.

Avstraliya TIV rahbari Maris Peyn esa koronavirus pandemiyasi boshlanishining sabablarini o‘rganish zaruriy choralardan biri ekanini qayd etgan.

Germaniya iqtisodiy hamkorlik va rivojlanish vaziri Gerd Myuller esa Pekinni virusning kelib chiqish sabablarini ochiq-oshkor aytishga chaqirgan. AQSh Senati ichki xavfsizlik va hukumat ishlari bo‘yicha qo‘mitasining raisi Ron Jonson koronavirusning kelib chiqish va tarqalishi, shuningdek Xitoy hamda JSSTning ushbu jarayondagi o‘rni taftish qilinishini aytib o‘tgan.