Россияда смартфонлар учун «Гусеница» номли мобил илова яратилди. У пиёдаларга ўз телефони ёрдамида светофорларни бошқариш имконини беради. Дастур «Глонасс» НП федерал оператори томонидан тақдим этилди, деб хабар беради Motor.
Дастурчиларнинг сўзларига кўра, янги технология шаҳар шароитида муваффақиятли синовдан ўтказилган. Синовлар давомида бир гуруҳ мактаб ўқувчиларининг йўлни кесиб ўтиш ҳолати моделлаштирилган. Синф раҳбари барча болалар йўлни кесиб ўтиши учун дастур ёрдамида светофорнинг яшил чироғи ёниш вақтини узайтира олади.
Ўқитувчилардан ташқари, мазкур илова ишчиларга, шунингдек, ҳаракатчанлиги чекланган одамларга, кўз хира кўрувчи инсонларга ва нафақахўрларга йўлнинг белгиланган қисмидан ўтишда шошилмасликка ёрдам беради.
Янги сервис муваффақиятли синовдан ўтказилганига қарамай, у Россияда 2021—2022 йиллардагина ишга туширилиши мумкин. Чунки мутахассисларга мобил сервиснинг ҳимоя тизимини яратиш учун вақт керак бўлади. Янги мобил илова автомобиль маълумотларини сақлаш ва қайта ишлашга мўлжалланган «Автодата» платформаси базасида яратилган.
Изоҳ (0)