Facebook компанияси гуруҳ бўлиб видеоқўнғироқлар ёрдамида мулоқот қилиш имконини берувчи Messenger Rooms сервиси ишга туширилишини маълум қилди.
Таъкидланишича, Messenger Rooms «дўстлар, яқинлар ва ҳамфикрлар билан вақт ўтказиш» имкониятини тақдим этади.
«Facebook ёки Facebook Messenger’да ‘хона’ яратинг ва видеоқўнғироғингизга исталган одамни, ҳатто Facebook’да аккаунти йўқ одамни ҳам таклиф қилинг. ‘Хона’га 50 нафаргача одамни таклиф қилиш мумкин, вақт чегараси (қўнғироқ) белгиланмаган», — дейилади компания баёнотида.
Шунингдек, таъкидланишича, функция Instagram Direct, WhatsApp ва Portal учун ҳам жорий этилади.
Бундан ташқари, Facebook WhatsApp’даги видеоқўнғироқлар функцияси кенгайтирилишини билдирди. Мазкур мобил илова ёрдамида қўнғироқлар ва видеоқўнғироқларни амалга оширишда 8 нафаргача фойдаланувчи иштирок эта олиши мумкин бўлади.
Сўнгги маълумотларга кўра, Facebook’нинг ойлик аудиторияси 2,5 миллиард фойдаланувчидан ошади. Компания мутахассисларининг ҳисоб-китобига кўра, дунёда 2,9 миллиарддан ортиқ одам ойда бир марта бўлса ҳам сервисга кириб кўради.
Аввалроқ Telegram’да гуруҳ бўлиб видеоқўнғироқларни амалга ошириш имконияти пайдо бўлиши ҳақида хабар берилганди.
Изоҳ (0)