29 апрель куни эрта тонгда Тошкент шаҳрининг халқаро аэропортига бортида Хитой ҳукумати юборган инсонпарварлик юклари бўлган самолёт келиб қўнди. Бу ҳақда Хитойнинг Ўзбекистондаги элчихонаси хабар берди.
Маълумотларга кўра, бу Хитой томонидан юборилган инсонпарварлик юкининг бир қисми ҳисобланади. Таъкидланишича, қолган қисми ҳам тез орада тайёрланади ва Ўзбекистонга етказилади.
«Юкларнинг қолган қисмидан 100 мингта тест тизими, 50 мингта ҳимоя кийими, 150 мингта KN95 тиббий ниқоби, 1 миллионта тиббий жарроҳлик ниқоби, 150 мингта тиббиёт қўлқопи ва 1000 дона масофавий термометр ўрин олган», — дейилади хабарда.
Эслатиб ўтамиз, дунёда коронавирус тарқалишига қарши кураш бошланганидан буён Ўзбекистон Хитойга, Эронга, Афғонистонга, Қирғизистонга, Тожикистонга, Беларусга, Озарбайжонга, Венгрияга инсонпарварлик ёрдами жўнатди. Ўз навбатида Ўзбекистон мазкур пандемияга қарши курашиш учун Хитой, БАА, Жанубий Корея ва АҚШдан ёрдам олди.
Изоҳ (0)