Шавкат Мирзиёев: Олотни ҳам, Қоракўлни ҳам янгилаб оламиз. Саросима ва хавотирга ўрин йўқ

Президент Шавкат Мирзиёев 28 апрель куни Бухоро вилоятининг Олот тумани марказида ҳудуд фаоллари билан учрашув ўтказди. Президент вилоятга 27 апрель оқшомида ёпирилган кучли шамол оқибатларини бевосита кўздан кечириш мақсадида ташриф буюрган эди.

«Олот ва Қоракўлда бўлган воқеа — бу ҳам Худо таолонинг бир синови», — деди Президент. Айни вақтда, давлат раҳбари табиий офат оқибатида катта қурбонлар берилмаганини «Худонинг берган катта марҳамати, жуда катта инъоми» деб атади. «Мен кечаси билан мижжа қоқмай, илоҳим ўлим бўлмасин дедим», — дея таъкидлади Шавкат Мирзиёев.

Президент юз берган ҳодиса ҳақида, етказилган зарарнинг кўлами тўғрисида тўла хабардорлигини билдирди. «Кечадан бери 10 марта маълумот берилди, раҳбарлар камерани ҳам кўрсатди, расмни ҳам кўрсатди. Лекин кўнглим тинчимади... Тошкентдан туриб гапириш ҳам мумкин, лекин келиб кўриш — мутлақо бошқа нарса... Сизлар билан кўришиб, кўриб кетганим учун ўзим тинч юраман», — деди Шавкат Мирзиёев.

Давлат раҳбари илгари кузатилмаган бундай табиий офат оқибатида зарар кўрган ҳар бир мактаб, боғча, шифохона, хонадон — барчага қанча маблағ, куч ва воситалар керак бўлса берилишини, бу борада қарорлар қабул қилинганини маълум қилди. «Ҳеч қандай зарар бўлмайди... Иккала туманни ҳам янгилаб оламиз. Ромитанни янги қилгандик, ундан ҳам янги қиламиз. Олотда ҳам эски шиферлар... Майли, бунинг ҳам кетгани — улуғ айём кунларида садақа дейди — садақа бўлсин-да, ҳаммасини янгилаб бераман», — деди Президент.

Давлат раҳбарининг таъкидлашича, бу ишларни 10 ё 5 кун эмас, ҳатто 3 кунда ҳам қилиш мумкин, бироқ бунда «карантин бўйича хавф кўпроқ бўлади», шу боис «бир балодан қутуламан деб, иккинчи балони олиб келиш» мақсадга мувофиқ эмас. «Худо хоҳласа, ҳамма йиқилган столбаларни ҳам тиклаймиз. ‘Аму-Бухорo’ насос станцияларини ҳам ишга туширамиз. Ҳозир темир йўлдан техника олиб келяпмиз, катта-катта таянчларни қўйиб, ҳаммасини жой-жойига қўямиз. Бирорта масала бўйича муаммо йўқ», — деди Президент.

Шавкат Мирзиёев учрашувда қатнашган жамоатчилик вакилларидан ваҳима ва саросимага тушмасликни илтимос қилиб, мана шундай пайтда ҳамма ўз ички имкониятларидан фойдаланиб, «одамларнинг руҳи тушмаслиги» учун ҳаракат қилиши кераклигини таъкидлади. «Энг катта нарса — ваҳимага тушмай, саранжом бўлиб, одамларимизни сақлашимиз керак... Ҳамманинг қозони қайнашига имконият ҳам берамиз, бошқа шароитини ҳам қиламиз... Сабр керак, тоқат керак, салгина вақт керак», — деди Шавкат Мирзиёев.