Туркияда 28 апрель ҳолатига кўра охирги бир сутка ичида коронавирус инфекциясига чалинганлар сони қарийб 2,4 мингтага кўпайди, мамлакатда COVID-19 билан касалланганларнинг умумий сони 114 мингдан ошган, бир сутка ичида вафот этганлар сони эса 92 нафарга етган. Бу ҳақда мамлакат соғлиқни сақлаш вазири Фаҳреттин Коча маълум қилган.
«Бугун коронавирус юқтириб олиш билан боғлиқ 2392 та янги ҳолат қайд этилди, жами касалланганлар сони – 114 653 нафар. Биз бугуннинг ўзида 92 нафар беморни йўқотдик, касалликдан ўлганлар сони 2992 нафарни ташкил этмоқда. Бир сутка ичида 5018 нафар бемор касалликдан тузалди, соғайганларнинг умумий сони 38 809 нафар», – деб ёзган вазир Twitter’да.
Туркиянинг 30 та шаҳрида 11 апрелдан бошлаб комендантлик соати жорий этилган. 14 апрелда мамлакат парламенти коронавирус пандемияси туфайли 90 мингга яқин маҳбусни вақтинча озод қилишга қарор қилди.
Жаҳон соғлиқни сақлаш ташкилоти 11 март куни коронавируснинг бутун дунёда тарқалиши пандемия даражасига етганини эълон қилган. Дунё бўйича COVID-19 коронавируси билан касалланганлар сони 3 миллиондан ошиб кетган.
Изоҳ (0)