Коронавирус пандемияси сабабли 2020 йилнинг иккинчи чорагида бутун дунёда 195 миллион киши ишсиз қолиши мумкин. Бу ҳақда Бирлашган Миллатлар Ташкилоти ҳисоботида қайд этилган.
БМТ экспертлари томонидан қайд этилишича, COVID-19 пандемияси дунё иқтисодиётини чуқур инқирозга туширмоқда ҳамда ишсизлик ва камбағалликни тарихий даражага етказмоқда.
БМТ прогнозига кўра, коронавирус оқибатида юзага келган инқироздан кичик ва ўрта кўрхоналар, қишлоқ хўжалиги ходимлари, ўз-ўзини банд қилганлар, қочоқлар ва меҳнат мигрантлари энг кўп зарар кўради.
Аввалроқ БМТ барча мамлакатлар ҳукуматини пандемиядан сўнг янги иқтисодиётни яратиш ва иш ўринларини кўпайтиришга чақирган эди.
«Аввалги одатий ҳаёт тарзига қайтиб бўлмайди. Шу ҳафта ва ойларда ҳукуматлар томонидан молиявий манбаларни оммавий равишда қайта тақсимланиши келажакда кутилаётган ўзгаришлар учқунидир», — деб таъкидлаган ташкилот мутахассислари.
Шунингдек, БМТ коронавирус пандемияси сабаб 30 га яқин давлатда очарчилик бўлиши мумкинлигини маълум қилганди. Ҳозирданоқ араб давлатларида 101 миллиондан ортиқ киши қашшоқлик ёқасида, 52 миллион киши эса тўйиб овқатланмайди.
Бутун дунёда коронавирус инфекцияси билан касалланганлар сони 3 миллион нафардан ошиб кетди, 878 мингдан зиёд киши касалликдан тузалган. 208 мингдан ортиқ киши касаллик қурбонига айланган.
Изоҳ (0)