Тошкентдан Москвага бортида 174 россиялик бўлган самолёт учиб кетди. Бу ҳақда Россиянинг Ўзбекистондаги элчихонаси консуллик бўлими вакилига таяниб, «РИА Новости» хабар берди.
Аввалроқ Россиянинг Рақамли ривожланиш, алоқа ва оммавий коммуникациялар вазирлиги Тошкент—Москва рейси 29 апрелга белгиланганини маълум қилган. Элчихона маълумотларига кўра, рейсга давлат хизматлари сайти орқали рўйхатдан ўтган россияликлар қўйилган. Уларга Тошкент халқаро аэропортига ўтишга рухсатнома берилган.
«‘Россия’ авиакомпаниясининг рейси 29 апрелда Тошкентдан Москвага соат 06:32 да учиб кетди. Унинг бортида 174 нафар Россия фуқароси бор», — деб маълум қилган элчихона вакили.
Россия пандемия сабаб 27 мартдан бошлаб бошқа давлатлар билан мунтазам ва чартер қатновларни тўхтатган эди. Бироқ олиб чиқувчи, юк, почта, санитар ва гуманитар рейслар, бўш самолётларнинг техник хизмат кўрсатиш учун бир жойдан бошқа жойга кўчирилиши, ёқилғи қуйиш ёки экипажни алмаштириш учун қўниш, транзит парвозлар ҳамда Россия ҳукумати қарори билан амалга оширилувчи рейслар бундан мустасно.
Аввалроқ хорижий давлатларда бўлиб турган ва ватанга қайтиш истагини билдирган Ўзбекистон фуқароларининг рўйхати тузилаётгани ҳақида хабар берилган эди. Коронавирус сабабли Россияда оғир вазиятга тушиб қолган ўзбекистонликларга ёрдам бериш учун «Саховат» маркази ташкил этилган. Ўзбекистон Ташқи ишлар вазирлиги ҳамда Сенат раиси Танзила Норбоева Россиядан ўзбекистонлик мигрантлар масаласида ёрдам сўраганди. Россия президенти Владимир Путин 18 апрель куни меҳнат муҳожирларининг иш патенти муддатини 15 июнгача узайтириш тўғрисидаги фармонни имзолади.
Мавзуга доир: Хориждаги ўзбекистонликларни олиб келувчи янги чартер рейсларини ташкил қилиш бўйича алоҳида қарор қабул қилинади
Изоҳ (0)