Самарқанд, Навоий, Бухоро вилоятларида шамол ва ёмғир сабаб газсиз қолган 138 мингдан ортиқ хонадонга газ қайта улаб берилди

Бухоро вилоятида кучли шамол ва ёмғир туфайли 120 та газ қувури ва газ таъминоти тизимининг бошқа объектларига талафот етгани оқибатида салкам 140 минг хонадон вақтинча газ таъминотидан узилиб қолгани хабар қилинганди.

«Ҳудудгазтаъминот» АЖнинг хабар беришича, талафотларни бартараф этиш учун АЖ таркибий бўлинмалари томонидан 63 та авария-тиклаш бригадаси тузилган. Таъмирлаш ишлари натижасида Самарқанд ва Навоий вилоятлари, Бухоро шаҳри ҳамда Бухоро вилоятининг айрим туманларидаги истеъмолчиларга газ таъминоти тўлиқ тикланган.

Хабарга кўра, фавқулодда вазиятларнинг олдини олиш мақсадида Сирдарё вилояти Боёвут туманидаги Ширин газ тақсимлаш станциясидан газ етказиб бериш вақтинча тўхтатилган. Станциядан газ етказиб бериш ишлари тикланган.

Самарқанд вилоятининг Каттақўрғон, Пахтачи, Иштихон, Нарпай туманларидаги 141 хонадонга газ етказиб бериш ҳам қайта тикланган. Вилоятда паст босимли газ қувурлари устига дарахт шохлари қулаши оқибатида юзага келган носозликларни тиклаш учун 4 та авария-тиклаш гуруҳи жойларга чиқарилган. Куннинг биринчи ярмида тўртта тумандаги газ таъминотини тиклаш ишлари якунланган.

«Ҳудудгаз Навоий» МЧЖ томонидан Навоий вилоятининг Навоий, Конимех, Навбаҳор, Қизилтепа ва Кармана туманларида паст ва ўрта босимли газ қувурларининг шикастланишини таъмирлаш учун 15 та авария-тиклаш гуруҳи тузилган. 21 мингдан ортиқ хонадон яна газ таъминоти тизимига уланган.

Об-ҳаво инжиқликларидан энг кўп талафот кўрган Бухоро вилоятининг Бухоро, Когон, Ромитан, Пешку, Ғиждувон, Шофиркон, Қоровулбозор ва Вобкент туманларида ҳам таъмирлаш-тиклаш ишлари якунланган. «Ҳудудгаз Бухоро» МЧЖ томонидан тузилган 44 та авария-тиклаш гуруҳи носозликларни бартараф этиб, вилоятнинг шаҳар ва туманларидаги 90 мингдан ортиқ хонадонга газ таъминотини қайта тиклаган. Олот, Жондор ва Қоракўл туманларида таъмирлаш-тиклаш ишлари ҳам тез орада якунига етказилади, дейилади хабарда.

Эслатиб ўтамиз, Бухорога 27 апрель оқшомида ёпирилган кучли шамол оқибатида камида 41 киши тан жароҳати олган, Бухоро шаҳрида яшовчи бир киши вафот этган. Маълумотларга кўра, унинг устига дастлаб дарахт ағдарилган, сўнг у электр симига ўралашиб қолиб, воқеа жойида ҳалок бўлган.

Президент Шавкат Мирзиёев 28 апрель, сешанба куни, Бухоро вилоятига ташрифи давомида кучли шамол оқибатида жиддий зарар кўрган Олот тумани марказида фаоллар билан учрашган, у ерда аҳолига ҳар томонлама кўмаклашиш ҳақида топшириқ берган.