Амударё қирғоқларидан тошиб чиқиб, Бухоро вилоятининг Олот ёки Қоракўл туманини сув босиши учун Амударёда сониясига 7 минг куб сув оқиши керак, бироқ 28 апрель ҳолатига кўра, дарёда сониясига 855 куб сув оқмоқда. Аму-Бухоро ирригация тизими ҳавза бошқармаси бошлиғи Эркин Файзуллаевнинг «Дарё»га маълум қилишича, бу уч кун аввалги кўрсаткичдан 345 кубга кам.
Эркин Файзуллаевнинг алоҳида таъкидлашича, бу йилги қиш мавсумида Амударё ирмоқларини сув билан тўйинтирувчи тоғларда етарли миқдорда қор ёғмаган. «Шу боис нафақат айни вақтда, балки умуман 2020 йил давомида тошқин бўлиши эҳтимоли деярли йўқ, аксинча, сув етишмовчилиги, қурғоқчилик кузатилиши мумкин», — деди Аму-Бухоро ирригация тизими ҳавза бошқармаси бошлиғи.
Бухоро вилоятида 27 апрель оқшомида кузатилган ёмғир аралаш кучли шамолдан сўнг 28 апрель куни Қоракўл ва Олот туманларида аҳолининг оммавий равишда уй-жойини ташлаб, қир ва тепаликларга кўчиб чиқиши ёки вилоят маъмурий маркази — Бухоро шаҳри томон йўл олиши ҳолати кузатилди. Фавқулодда вазиятлар вазирлигидан «Дарё»га маълум қилишларича, бунга тошқин бўлиши мумкинлиги ҳақидаги миш-мишлар сабаб бўлган.
Эркин Файзуллаевнинг таъкидлашича, бундай миш-миш ва ваҳималарга электр таъминотидаги узилиш туфайли насос станциясининг ишламай қолгани сабаб бўлган бўлиши мумкин. Бироқ насос станциясининг вақтинча ишламай қолиши ҳам Қоракўл ёки Олот туманлари ҳудудида сув тошқини келиб чиқишига сабаб бўлмайди.
Изоҳ (0)