Қашқадарё вилоятидан Бухоро вилоятига кучли шамол оқибатларини бартараф этишда ёрдам бериш мақсадида юборилган 200 нафарга яқин қурувч карантин чекловлари сабаб ортга қайтарилди. Бу ҳақда Қашқадарё ҳокимлиги ахборот хизмати маълум қилмоқда.
Хабар берилишича, 28 апрель куни Бухоро ва Қашқадарё ҳокимларининг телефон орқали мулоқотидан сўнг, Зоир Мирзаев ўринбосари Сирожиддин Азизов бошчилигидаги 200 нафарга яқин қурувчини қўшни вилоятга юборган.
Бироқ қашқадарёлик қурувчилар Бухоро вилоятига киришдаги постда ортга қайтарилган.
«Тегишли ташкилотлар текширувидан сўнг рухсат этилган тақдирда қурувчи-усталар қўшни вилоятга кириши маълум қилинди», — дейилади Қашқадарё ҳокимлиги ахборот хизмати тарқатган хабарда.
Эслатиб ўтамиз, 27 апрель куни республика ҳудудига кириб келган кучли шамол Бухоро, Навоий, Самарқанд ва Қашқадарё вилоятларида аҳоли ҳаёти, инфратузилма тармоқлари ва қишлоқ хўжалиги экинларига катта зарар етказган. Юзага келган шамол оқибатларининг асосий қисми Бухоро вилоятига тўғри келмоқда. 27 апрель оқшомида ёпирилган кучли шамол оқибатида вилоятда камида 41 киши тан жароҳати олган, бир киши вафот этган.
Изоҳ (0)