Ўзбекистон тиббиёт ходимларининг бугунги кунда коронавирусга қарши олиб бораётган машаққатли ва ўта масъулиятли меҳнатини муносиб қадрлаш ва рағбатлантириш учун Президент Шавкат Мирзиёев яна бир муҳим қарорни имзолади. Бу ҳақда Президент 29 апрель, чоршанба куни, бўлиб ўтган йиғилишда маълум қилди.
Қарорга кўра, санитария-эпидемиология хизматининг қарийб 11 мингга яқин барча тоифадаги тиббиёт ходимларининг иш ҳақи 2,5 бараварга оширилди.
«Умуман, карантин қоидаларини ўз вақтида жорий этганимиз ва халқимиз унга сабр-тоқат билан амал қилаётгани туфайли кўплаб туман ва шаҳарларда инфекция тарқалишига йўл қўймадик», — деди Шавкат Мирзиёев.
Президент бугунги кунда мамлакат бўйича коронавирусга чалинган 1066 нафар ёки 55 фоиз бемор тўлиқ соғайганини алоҳида қайд этиб ўтди. Охирги 5 кунда 505 нафар бемор тузалган.
Қайд этилишича, қолган беморларни ҳам даволаш юзасидан мамлакатда амалий ёрдам бераётган 18 нафар хитойлик, германиялик, кореялик шифокорлар ҳамда телемедицина орқали бошқа етакчи хорижий мутахассислар билан ҳамкорлик қилган ҳолда барча зарур чоралар кўрилмоқда.
Шунингдек, давлат раҳбари касалликка қарши курашга жалб қилинган ходимлар ва карантин қоидаларига риоя қилаётган аҳолига ҳам миннатдорчилик билдирди.
Қадрли юртдошлар!Президент мазкур йиғилишда Ўзбекистонда карантин чекловларини енгиллаштириш бўйича дастлабки чораларни маълум қилди. Шунингдек, Ўзбекистонда карантин сабабли фаолияти тўхтаган 10 мингга яқин корхонанинг ишини қайта тиклаш бўйича қарор қабул қилингани маълум бўлди.Шу ўринда кўнглимдаги бир фикрни жамоатчилигимиз, халқимизга очиқ айтмоқчиман.
Мана, бир ярим ойдан ошдики, эл-юртимиз ‘Уйда қолинг’ деган даъватга амал қилиб, юксак жасорат кўрсатиб, ялпи карантин шароитида яшамоқда. Оилам, бола-чақам, деб тиниб-тинчимайдиган, эртаю кеч ғайрат билан меҳнат қиладиган халқимиз учун бундай мажбурий ҳолат, албатта, осон кечаётгани йўқ.
Юртдошларимиз оғир синов кунларида чинакам сабр-тоқат ва масъулият, меҳр-оқибат фазилатларини намоён этяпти.
Буни жаҳон ҳамжамияти ҳам тан олиб, ҳар томонлама эътироф этмоқда.
Фурсатдан фойдаланиб, пандемияга қарши курашнинг олдинги сафларида чинакам қаҳрамонлик кўрсатаётган барча шифокорларимизга, шу жумладан, тез ёрдам хизмати ходимлари ва ҳайдовчиларига алоҳида миннатдорчилик билдираман.
Шу жараёнда ўзини аямасдан хизмат қилаётган ҳуқуқ-тартибот идоралари ходимларига, мард ва жасур ҳарбийларимизга, вазирлик ва идоралар, ҳокимликларнинг раҳбарлари ва хизматчиларига, муҳтарам нуронийларимиз ва маҳалла фаолларига, саховатпеша тадбиркорларимизга, олимларимиз, ўқитувчи ва домлалар, ижодкор зиёлиларимиз, имом-хатибларимизга чин дилдан раҳмат айтаман.
Ҳозирги мураккаб шароитда ўз профессионал бурчини виждонан бажараётган оммавий ахборот воситалари вакилларига, инсонпарварлик намунасини кўрсатиб, кўнгилли бўлиб волонтёрлик ҳаракатида қатнашаётган фидойи ёшларимизга ўз номимдан, халқимиз номидан катта миннатдорчилик билдираман.
Шавкат Мирзиёев, Ўзбекистон Президенти
Шавкат Мирзиёев 22 апрель куни глобал инқироз ва пандемия шароитида мамлакат аҳолиси бандлиги масалаларига бағишлаб ўтказилган видеоселектор йиғилишида ҳам Ўзбекистонда коронавирусга қарши курашаётган шифокорлар ва куч тузилмаларига алоҳида миннатдорчилик билдирган эди.
Эслатиб ўтамиз, Ўзбекистонда коронавирусга қарши курашда иштирок этадиган шифокорлар ва бошқа ходимларнинг ҳар 14 кунлик фаолият даври учун Президент томонидан махсус қўшимча рағбатлантириш тўлови белгиланган. Унга кўра, врач-ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўм. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.
Шунингдек, коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)