Levandovski, Xames, Riberi. “Bavariya”ning 2018/19-yilgi mavsumdagi eng chiroyli gollari (video)

“Daryo” futbol muxlislarining talab va takliflarini inobatga olgan holda turli musobaqalarda urilgan eng sara gollarni taqdim etib kelmoqda. Ushbu loyihaning navbatdagi sonida “Bavariya” klubining 2018/19-yilgi mavsumdagi eng chiroyli gollari taqdim etiladi. Gollar reytingi “Bavariya” matbuot xizmati talqiniga ko‘ra tuzib chiqilgan.

10-o‘rin. Leon Goretska | “Mayns”—“Bavariya” (1:2)

Goretska myunxenliklar uchun qiyin kechgan bahsda hisobni shu tariqa ochgandi.

9-o‘rin. Tomas Myuller | “Shtutgart”—“Bavariya” (0:3)

Tomas Myuller mavsum debyutidagi uchrashuvda hisobni yirik ko‘rinishga olib kelgandi. Undan avval Myuller ushbu uchrashuvda bitta assistni o‘z hisobiga yozdirib qo‘ygandi.

8-o‘rin. Xames Rodriges | “Bavariya”—“Mayns” (4:0)

2018/19-yilgi mavsumni “Bavariya”da ijarada o‘tkazgan Rodriges ushbu o‘yinni o‘z benefiga aylantirgan va 2016-yildagi Xamesni eslatib yuborgandi. O‘sha uchrashuvda het-trik qayd etgan kolumbiyalik futbolchi ikkinchi to‘pni o‘z uslubida kiritgandi.

7-o‘rin. Robert Levandovski | “Borussiya D”—“Bavariya” (3:2)

Robert Levandovski mazkur bahsda sobiq jamoasi darvozasini ikki bor ishg‘ol qiladi, biroq myunxenliklar hisobni ushlab qololmaydi. Marko Roysning dubli va Pako Alkaserning goli dortmundliklarga irodali g‘alabani taqdim etadi.

6-o‘rin. Aryen Robben | “Bavariya”—“Bayer” (3:1)

Robben jarima maydoniga kirib ajoyib zarbasi bilan gol urgan va jamoasining irodali g‘alabasiga hissa qo‘shgandi.

5-o‘rin. Rafinya | “Ayntraxt”—“Bavariya” (0:3)

Frank Riberining dublidan keyin braziliyalik futbolchi so‘nggi daqiqalarda mana shu “san’at asari”ga mualliflik qilgandi.

4-o‘rin. Robert Levandovski | “Bavariya”—“Borussiya D” (5:0)

Mehmonlarning himoyadagi xatosidan foydalangan Robert yana dortmundliklar darvozasiga chiroyli to‘p kiritadi. “Bavariya” mazkur o‘yinda prinsipial raqibini tor-mor keltiradi va chempionlik poygasida muhim qadam tashlaydi.

3-o‘rin. David Alaba | “Gannover”—“Bavariya” (0:4)

Alaba o‘zining “pushka” zarbasi bilan o‘yinni bezagandi.

2-o‘rin. Robert Levandovski | “Frayburg”—“Bavariya” (1:1)

Uchrashuvda tezkor gol o‘tkazib yuborgan Myunxen klubi 22-daqiqada Levandovskining shedevri evaziga hisobni tenglashtiradi.

1-o‘rin. Frank Riberi | “Bavariya”—“Ayntraxt” (5:1)

Qanotdan jarima maydoniga yorib kirgan Riberi darvozabon ustidan oshirgan holda to‘p kiritadi. Bu fransiyalik futbolchining “Bavariya” safidagi so‘nggi goli bo‘lib tarixga kirgandi.