Билл Гейтс пандемиядан кейинги одатдаги ҳаёт тарзи қачон бошланишини маълум қилди

Microsoft асосчиси ва собиқ раҳбари Билл Гейтснинг сўзларига кўра, коронавирус пандемиясидан сўнг дунё бир ёки икки йилдан кейингина одатдаги ҳаёт тарзига қайтиши мумкин. Бу ҳақда у Figaro нашрига берган интервьюсида маълум қилган.

«Бир ёки икки йилсиз одатдаги ҳаёт тарзимизга қайтмаймиз», — деган миллиардер.

Гейтснинг таъкидлашича, одамлар барибир вирус билан касалланиш эҳтимолидан хавотирда бўлади ва ўз хатти-ҳаракатларини тубдан ўзгартиради. Унинг сўзларига кўра, бу каби вазият даволаш ёки вакцина «ўлим ҳолати хавфини ортда қолдириши»ни исботланмагунга қадар давом этади.

Гейтснинг фикрича, ҳозир Хитойни «шошма-шошарлик билан айблаш» эмас, балки ҳамкорлик қилишнинг айни вақти.

Февраль ойининг охирларида Билл Гейтс коронавируснинг тарқалиш тезлигини 1918 йилда тарқалган испан гриппига қиёслаган эди. Ўшанда «испанка» оқибатида дунё бўйлаб 50 миллиондан ортиқ одам вафот этган.

Аввалроқ Билл Гейтс Трампнинг Жаҳон Соғлиқни сақлаш ташкилотини молиялаштиришни тўхтатиш қарорини хавфли деб атаганди: «Агар унинг иши тўхтайдиган бўлса, бошқа ҳеч қандай ташкилот унинг ўрнини босолмайди. Ҳозирда ЖССТ бизга ҳар қачонгидан ҳам зарур», — деди Microsoft асосчиси.

Жаҳон соғлиқни сақлаш ташкилоти раҳбарининг таъкидлашича, коронавирус пандемияси ҳали бери тугамайди.