Shimoliy Koreya yetakchisi Kim Chen Inda yurak jarrohlik amaliyotini o‘tkazgan shifokor uni o‘z vaqtida bajara olmadi. Bu haqda Yaponiyaning Shukan Gendai jurnaliga Xitoyning tibbiy doiralaridagi manbasi xabar bergan.
Uning aytishicha, KXDR rahbarining mamlakat bo‘ylab navbatdagi safarida u to‘satdan yurak hovuchlab qolib, yiqilgan. Tibbiy yordam ko‘rsatish maqsadida u yaqin oradagi kasalxonaga olib borilgan. Shu bilan birga, Pekinga malakali shifokorlar guruhini yuborish so‘rovi jo‘natilgan. Ular Pekindan KXDRga 23-aprel kuni jo‘nab ketgan.
Kim Chen Inning ahvoli og‘ir bo‘lganidan, xitoylik shifokorlar kelishini kutsa kech bo‘lishini o‘ylab, yurak qon tomirlarini stentlash jarrohlik amaliyoti mahalliy shifokorga ishonib topshirilgan. Qayd etilishicha, bu murakkab bo‘lmagan operatsiya bo‘lib, taxminan bir daqiqada tugatish mumkin.
Manbaning ta’kidlashicha, jarroh shu darajada asabiylashganidan qo‘llari tom ma’noda qaltiragan. Qolaversa unda to‘ladan kelgan mijozlarni operatsiya qilish bo‘yicha tajriba bo‘lmagan. Natijada 1 daqiqada bitirish mumkin bo‘lgan operatsiyani 7 daqiqada tugatgan va shu sababli Kim Chen In “vegetativ holatga tushib qolgan”. Yetib kelgan xitoylik shifokorlar uni ko‘zdan kechirgan, lekin hech narsa qila olmagan.
Avvalroq CNN telekanali AQSh KXDR yetakchisi Kim Chen Inning sog‘lig‘i jarrohlik amaliyotidan so‘ng yomonlashgani to‘g‘risidagi razvedka ma’lumotlarini o‘rganayotganini ma’lum qilgandi. Prezident Donald Tramp esa Kim Chen Inning sog‘lig‘i yomonlashgani to‘g‘risidagi xabarlarga javob berar ekan, CNN’ga unchalik ishonmasligini bildirgan.
25-aprel kuni kechasi Xitoyning Weibo ijtimoiy tarmog‘ida Gonkongning HKSTV televideniyesi direktori o‘rinbosari nomidan Kim Chen Inning o‘lgani haqidagi xabar paydo bo‘lgan.
KXDR markaziy gazetasi Rodong Sinmun, shuningdek, mamlakat markaziy radiosida esa Kim Chen Inning o‘limi to‘g‘risidagi xabarlar fonida uning nomidan bayonot e’lon qilingan. Unda Samchjiyon shahrida so‘nggi yillarda olib borilayotgan qurilish ishlarida mehnat qilayotgan ishchilarga minnatdorchilik bildirgan. Biroq bayonot qachon berilgani va hozirda Kim Chen In qayerda ekanligiga oydinlik kiritilmagan.
Ma’lumotlarga ko‘ra, Shimoliy Koreyada 2019-yildan buyon hokimiyatni topshirish uchun favqulodda reja tayyorlanmoqda. Mamlakat tepasiga amaldagi rahbar Kim Chen Inning o‘rniga uning singlisi Kim Yo Chjon kelishi mumkin.
Izoh (0)